Անհայտ անձինք հայ տաքսիստի գործատուից 5 մլն ռուբլի փոխհատուցում են պահանջում Տիմատիի այրված մեքենայի համար (տեսանյութ)

Ինչպես ավելի վաղ տեղեկացրել էինք, Մոսկվայի կենտրոնում վերջերս ճանապարհատրանսպորտային պատահար էր տեղի ունեցել հայ տաքսու վարորդ Հրանտ Ալթունյանի և ռեփ կատարող Տիմատիի անվտանգության աշխատակիցների մասնակցությամբ, որի հետևանքով ռեփերին պատկանող մեքենան այրվել էր։ 

Հրդեհման պատճառ դարձած տաքսու հայ վարորդ Հրանտ Ալթունյանի գործատուն՝ Արթուր Մարտիրոսյանը, 360° հեռուստաալիքին պատմել է, որ միջադեպից հետո ինչ-որ մարդիկ իրենից պահանջել են փոխհատուցել այրված մեքենայի արժեքը:

Գործատուն չի պատրաստվում վճարել այրված մեքենայի համար, քանի որ կատարվածի մեղավորը տաքսու վարորդ Հրանտ Ալթունյանն է:

Ինչպես նշում է 360tv.ru-ն, Արթուր Մարտիրոսյանը խոստովանել է, որ վերջերս իրեն զանգահարել են, իսկ հետո նաև տուն են եկել անհայտ անձինք, որոնք պահանջել են 5 մլն ռուբլի վճարել ռեփերի այրված մեքենայի համար:

Մարտիրոսյանը նշել է, որ այդ մարդիկ կարող են լինել կողմանկի անձինք, ովքեր իմանալով դեպքի մասին, փորձել են գումար կորզել։