Հայաստանը պարտավորվում է բացահայտել մետաղական հանքաքարերի իրական արդյունահանողներին

Կառավարության նիստի մարտի 29-ի օրակարգում ընդգրկված է մի օրինագիծ, որը ենթադրում է բացահայտել Հայաստանում մետաղական հանքաքար արդյունահանող կազմակերպությունների իրական սեփականատերերին:

Վաղը կառավարությունը կհաստատի բացահայտման համար անհրաժեշտ միջոցառումների ճանապարհային քարտեզը:

Նշենք, որ կառավարության 2017-2022 թթ. ծրագրով նախատեսվում է Արդյունահանող ճյուղերի թափանցիկության նախաձեռնության (ԱՃԹՆ) ներդրման շրջանակում մշակել հանքարդյունաբերության ոլորտի իրական սեփականատերերի բացահայտման ճանապարհային քարտեզ: ԱՃԹՆ-ն իրականացնող երկրներում 2020 թվականից սկսած՝ հանքարդյունահանող ընկերությունները պետք է բացահայտեն իրենց իրական սեփականատերերին, ի դեպ, այդ թվում՝ քաղաքական ազդեցություն ունեցող անձանց:

Իսկ ճանապարհային քարտեզում նշված միջոցառումների մի մասը կիրականացվի Համաշխարհային բանկի դրամաշնորհի շրջանակներում, որից հետո կձևավորվի և հանրությանը կներկայացվի իրական սեփականատերերի ռեգիստրը:

Նշենք նաև, որ ճանապարհային քարտեզը հավանության է արժանացել վարչապետի որոշմամբ հաստատված բազմաշահառու խորհրդի կազմի կողմից, որը  ներառում է համապատասխան 6 գերատեսչությունների, ոլորտի խոշոր հանքարդյունահանող ընկերությունների և քաղաքացիական հասարակության ներկայացուցիչների:

Ուստի, ճանապարհային քարտեզում նշված միջոցառումների արդյունավետ իրագործման համար անհրաժեշտություն է առաջանում փաստաթուղթն ամրագրել Կառավարության որոշմամբ, որից հետո իրավական ակտերի մշակման նպատակով կստեղծվի միջգերատեսչական խումբ:

Սոնա Հարությունյան