Արագ շախմատի մրցաշարով մեկնարկել են ոչ պետական բուհերի մարզական խաղերը

 Արագ շախմատի մրցաշարով մարտի 28-ին մեկնարկել են Հայաստանի երիտասարդական հիմնադրամի և «Հայաստանի ոչ պետական բուհերի ուսանողական կենտրոն» ՀԿ-ի կողմից անցկացվող մարզական խաղերը։

Ինչպես ԼՈՒՐԵՐ.com-ին տեղեկացրին Հայաստանի երիտասարդական հիմնադրամի հասարակայնության հետ կապերի ծառայությունից, մարզական խաղերին մասնակցում են 9 ոչ պետական բուհի ավելի քան 150 ուսանող։ Խաղերը կայանում են 5 մարզաձևերում՝ արագ շախմատ, սեղանի թենիս, վոլեյբոլ, ֆուտզալ, բազկամարտ։

Արագ շախմատի մրցաշարում առաջին հորիզոնականը գրավել է «Մարտիգ» արտաքին տնտեսական կապերի համալսարանի ուսանող Գրիգոր Ավետիսյանը, երկրորդ տեղը գրավել է գործնական հոգեբանության և սոցիոլոգիայի «Ուրարտու» համալսարանը ներկայացնող Նելլի Հարությունյանը, իսկ երրորդ տեղում է Հայկական բժշկական ինստիտուտի ուսանող Վիկտորյա Օհանյանը։

Մարտի 29-ին մարզական խաղերի շրջանակներում տեղի կունենա բազկամարտի մրցույթը։