Արմավիր-Երեւան երթուղին սպասարկող ընկերությունը կենթարկվի վարչական պատասխանատվության

ՀՀ տրանսպորտային տեսչությունը Արմավիր-Երեւան երթուղին սպասարկող  «Գալակտիկա տրանս սերվիս» ընկերությունում խախտումներ է արձանագրել: 

«Արմենպրես»-ի հետ զրույցում այս մասին ասաց ՀՀ տրանսպորտի, կապի եւ տեղեկատվական տեխնոլոգիաների նախարարության աշխատակազմին փոխադրումների քաղաքականության բաժնի պետ Դավիթ Մելքոնյանը: « Ընկերությունը կենթարկվի համապատասխան վարչական պատասխանատվության»,-ասաց նա:

Երթուղին սպասարկող վարորդները արդեն երկու օր է գործադուլ են անում: Մելքոնյանի խոսքով` ինքը եղել է Արմավիրի ավտոկայանում եւ զրուցել վարորդների հետ: «Քննարկել ենք խնդիրները: Գործադուլի պատճառը ներքին կազմակերպչական խնդիրներն են»,-հավելեց նա:

Դավիթ Մելքոնյանն ասաց, որ քննարկումներ են եղել նաեւ երթուղին սպասարկող կազմակերպության տնօրենի եւ համասեփականատիրոջ հետ: «Բանակցությունները շարունակվում են»,-հավելեց Մելքոնյանը: