Գերմանիայի դեսպանը հայերի տվյալները կտա թուրքական ընկերությանը. փորձագետը լուրջ խնդիր է տեսնում

Հայաստանում Գերմանիայի  արտակարգ և լիազոր դեսպան Մաթիաս Քիսլերը երեկ  հայտարարեց, որ 2018թ. ապրիլի 3-ից հայաստանցիներիս շենգենյան գոտի մուտք գործելու համար վիզա կտրամադրի «ՎիզաՄետրիկ» ռուս-թուրքական կոնսորցիումը: Սակայն այս փաստը մեծ դժգոհություն է առաջացրել քաղաքացիների շրջանում:

ԼՈւՐԵՐ.com-ի թղթակցի հետ զրույցում «Ինֆորմացիայի ազատության կենտրոն»-ի նախագահ Շուշան Դոյդոյանը նշեց, որ անձնական տվյալների  մշակման գործընթացում ընկերությունը պետք է հետևի մի քանի սկզբունքների.

«Անձնական տվյալների հավաքումը ՀՀ քաղաքացիներից պետք է ունենա կոնկրետ օրինական նպատակ: Տվյալ դեպքում օրինական նպատակը քաղաքացիների վիզաների տրամադրման գործընթացը հեշտացնելն է: Կարևոր է, որ այս գործընթացում ձեռք բերված տվյալները լինեն այն ծավալով, որքան անհրաժեշտ է տվյալ նպատակին հասնելու համար: Այսինքն քաղաքացուց պետք է պահանջեն այնպիսի փաստաթղթեր, որոնք անհրաժեշտ են ստուգելու համար պետք է արդյոք նրան տրամադրել մուտքի թույլտվություն, թե ոչ: Հավելյալ տեղեկություններ արգելվում է պահանջել: Մյուսը՝ նպատակի սահմանափակման սկզբուքն է, որ այս նպատակով հավաքված տվյալները չեն կարող օգտագործվել այլ նպատակով: Այսինքն նպատակի փոփոխություն չի կարող տեղի ունենալ»,- ասաց Դոյդոյանը:

Նրա խոսքով՝ անձնական տվյալները այլ երկիր փոխանցելուց առաջ, ընկերությունը պարտադիր պետք է ունենա Անձական տվյալների պաշտպանության գործակալության թույլտվությունը, որից հետո միայն իրականացնի գործընթացը:

Բացի անձնագրային տվյալներ ձեռք բերելուց, Դոյդոյանը այլ խնդիր էլ է տեսնում. «Ձեռք են բերելու նաև կենսաչափական անձնական տվյալներ, որոնք անսխալական նույնականացում են ենթադրում: Օրինակ՝ մարդու մատնահետքը եզակի է և չի կրկնվում: Սա նշանակում է, որ այս տվյալները բացառիկ կարևորություն ունեն մարդու նույնականացման հարցում»:

Անդրադառնալով այս գործընթացում թուրքական ընկերության ներգրավման խնդրին, փորձագետը նկատեց. «Սա լուրջ խնդիր է. մի երկիր, որի հետ չունենք դիվանագիտական հարաբերություն, այդ երկրին պատկանող ընկերությունը հնարավորություն է ունենում օգտագործելու ՀՀ քաղաքացիների անձնական տվյալները»,- ասաց նա:

Դոյդոյանը ևս կիսում է այն քաղաքացիների մտահոգությունը, թե ինչո՞ւ պետք է իրենց անձնական տվյալները հայտնեն թուրքական ընկերությանը: Ըստ նրա Անձնական տվյալների պահպանության գործակալությունը պետք է վերահսկողություն իրականացնի, որպեսզի քաղաքացիների անձնական տվյալները պաշտպանված լինեն. «Մենք ունենք պետական լիազոր մարմին, որը պետք է ապահովի ՀՀ քաղաքացիների անձնական տվյալների մշակման օրինականությունը, պաշտպանությունը և լիահույս եմ, որ գործակալությունը հիմնավորումներ կպահանջի, խախտումների դեպքում՝ կարձանագրի, թույլտվություն կտա կամ չի տա, ամեն դեպքում շատ կարևոր է, որ ունենք լիազոր մարմին, որը կզբաղվի այս հարցով»,- նշեց «Ինֆորմացիայի ազատության կենտրոն»-ի նախագահը: 

Սոնա Հարությունյան