Չորս հարյուր արցախցիներ համալրել են «Ոսկրածուծի դոնորների հայկական ռեեստր»-ի շարքերը

«Ոսկրածուծի դոնորների հայկական ռեեստր» բարեգործական հիմնադրամն Արցախի Հանրապետության կրթության նախարարության, ի դեմս նախարար Նարինե Աղաբալյանի, և առողջապահության նախարարության, ի դեմս նախարար Կարինե Աթայանի հետ մարտի 26-ին և 27-ին իրականացրել են դոնորագրումներ:

Այս մասին տեղեկացրին հիմնադրամից՝ հավելելով. «Նշանակալից և շատ կարևոր այս միջոցառումները տեղի ունեցան Արցախի Պետական, Շուշիի Տեխնոլոգիական, Ստեփանակերտի «Մեսրոպ Մաշտոց» և «Գրիգոր Նարեկացի» համալսարաններում, ինչպես նաև Արցախի Հանրապետական բժշկական կենտրոնում: Դոնորագրմանը մասնակցեց նաև Արցախի ՀՕՄ-ի միավորը՝ նորակառույց «Սոսե» մանկապարտեզում: 

Դոնորագրման միջոցառումները արցախահայության շրջանում ընդունվեցին մեծ խանդավառությամբ և ոգևորությամբ։ Ապրելով պատերազմի ամենօրյա սպառնալիքի տակ՝ Արցախի երիտասարդությունը առանց վարանելու օգնության ձեռք մեկնեց այն հիվանդներին, որոնց միակ փրկությունը ցողունային բջիջների փոխպատվաստումն է: Մասնակիցները շատ հետաքրքրված էին «Ոսկրածուծի դոնորների հայկական ռեեստր»-ի գործունեությամբ, անցած ճանապարհով: Երկօրյա դոնորագրումների արդյունքում ավելի քան 400 կամավոր դոնորներ պատրաստակամությամբ միացան հիմնադրամի աշխարհասփյուռ ընտանիքին։

Հիմնադրամի գործադիր տնօրեն Սևակ Ավագյանը և բժշկական տնօրեն Միհրան Նազարեթյանը դասախոսություններ կարդացին՝ հավաքվածներին ներկայացնելով ռեեստրի գործունեությունը, ձեռքբերումները և կարևորությունը։ 18 տարի է, ինչ հիմնադրամը նվիրվել է լեյկեմիայի և արյան չարորակ այլ հիվանդությունների դեմ պայքարին՝ ձգտելով օգնել աշխարհասփյուռ հայերին և օտարազգիներին հաղթահարել այդ մահացու հիվանդությունները:

«Ոսկրածուծի դոնորների հայկական ռեեստր» բարեգործական հիմնադրամը ստեղծվել և հիմնադրվել է Հայաստանում 1999 թվականին՝ ի պատասխան լեյկեմիայով և արյան այլ հիվանդություններով տառապող երեխաների կյանքի փրկության և բուժման համար ստեղծված խիստ անհրաժեշտության։ Կազմակերպությունը գրանցվել է, որպես շահույթ չհետապնդող բարեգործական հիմնադրամ, որտեղ մինչ օրս կամավորագրվել է ավելի քան 29.000 դոնոր»։