Գործը հասավ Աբրահամյանի և Սարգսյանի հավատարիմ կադրին

Երեկ ոստիկանության աշխատակիցները զինաթափել են Սերժ Սարգսյանի վերահսկողական ծառայության նախկին ղեկավար եւ ՊԵԿ նախկին պետ Հովհաննես Հովսեփյանին. վերջինիս ավտոմեքենաներում հայտնաբերվել է զենք-զինամթերք:

Հովսեփյանը նախկին վարչապետ Հովիկ Աբրահամյանի կադրն էր համարվում երկար տարիներ, ավելին՝ նրա եղբոր` Ջոնիկի մտերիմ ընկերն է: Հովսեփյանին կառավարման համակարգ է մտցրել հենց Աբրահամյանը, նշանակել տվել տարածքային կառավարման նախարարի խորհրդական, հետո էլ, անսալով Արմեն Գեւորգյանի խնդրանքներին` աջակցել փոխնախարար նշանակվելու գործում: Բայց Հովսեփյանը տարիների ընթացքում հաջողացրել է տեղավորվել Սերժ Սարգսյանի շրջապատում՝ դառնալով ՀՀ նախագահի վերահսկողական ծառայության ղեկավար, այնուհետև ՊԵԿ պետ: Հովհաննես Հովսեփյանը, պարզվում է, նախագահի աչքի առջեւ վերահսկողական գործառույթներ իրականացնելուն զուգահեռ սեփական հարստությունն էր դիզել: Դա էլ դեռ քիչ էր՝ ՊԵԿ ղեկավար եղած ժամանակ ստվերային շրջանառությունները վերահսկելու նպատակով մաքսային բոլոր միջնորդները իրենց գործունեությունը կազմակերպում էին Հովսեփյանի վստահելի «Ուրբան լոգիստիկ սերվիսիզ» ՓԲԸ-ի՝ Չարբախում գործող մաքսային պահեստի միջոցով: Միայն այս փաստը բավական է, որպեսզի պարզ զինաթափմամբ գործը չավարտվի և պատկան մարմինները ավելի խորը և համակողմանի ուսումնասիրեն Հովսեփյանի ղեկավարած կառույցներում պոտենցիալ կոռուպցիոն սխեմաները և ռիսկերը:

Հովիկ Աբրահամյանի կառավարության հրաժարականի և Կարեն Կարապետյանի կառավարության ձևավորման օրերին Հովհաննես Հովսեփյանի պաշտոնանկության մասին բազմիցս էր խոսվում, սակայն պաշտոնանկությունը ուշանում էր: Ի վերջո՝ որոշումը կայացվեց. Հովսեփյանը պաշտոնանկ եղավ` տեղը զիջելով Վարդան Հարությունյանին: Հարությունյանն էլ, ինչպես ասում են՝ սրբերի շարքից չէ: Բավական է հիշել նույն «Նորֆոլկ Քոնսալթինգի» գործը, որով, ի դեպ, ՊԵԿ նախկին ղեկավարին դեռևս չեն շտապում հարցաքննել, չնայած պարզից էլ պարզ է նրա մասնակցությունը բացահայտված կոռուպցիոն մեխանիզմներին:

Ինչևէ, իրադարձությունները ցույց են տալիս, որ իրավապահ մարմինները ընդհուպ մոտենում են Հովիկ Աբրահամյանի և Սերժ Սարգսյանի հավատարիմ կադրերին: Սպասենք նոր զարգացումների: