Արմավիրցի ակտիվիստները քաղաքապետի հրաժարականն իրենց հաղթանակն են համարում

Ինչպես տեղեկացրել ենք, Արմավիր քաղաքում արդեն տևական ժամանակ է՝ բողոքի ակցիաներ են ընթանում գործող քաղաքապետ Ռուբեն Խլղթյանի  պաշտոնավարման դեմ։

Ցուցարաները թվով շատ չէին, բայց հաստատակամ էին իրենց որոշման մեջ՝ «Ռուբեն, հեռացի՛ր»։ Նրանք պատմում էին, որ գործող քաղաքապետի  շուրջ 14 տարվա  պաշտոնավարման ժամանակ  որևէ դրական տեղաշարժ չեն տեսել քաղաքում։

Այսօր՝ հունիսի 22-ին, ավագանու նիստի ժամանակ քաղաքապետն ասաց, որ մինչ օրակարգային հարցերին անցնելը հայտարարություն ունի։

«Հարգելի՛, ավագանու անդամներ, արդեն 1 շաբաթ է, որ «Ամրավիրի նախաձեռնող խմբի» կողմից  հասարակական կարգ ու կանոնի, արմավիրցիների և քաղաքի հյուրերի առօրյա բնականոն կյանքի խախտման պայմաններում  քայլերթեր և երթեր են իրականացվում Արմավիր քաղաքում՝  քաղաքապետի հրաժարականի պահանջով։ Այստեղ եղող յուրաքանչյուրը կհաստատի, որ այս օրերի ընթացքում նրանց թիվը չգերազանցեց նույնիսկ 50-ը»,-հայտարարեց քաղաքապետը։

Նա  նկատեց, որ թեպետ ցույցերը շարունակվում էին, բայց արմավիրցիները ցուցաբերում էին զսպվածություն, չէին միանում՝ դրանով ցույց տալով հարգանք իր նկատմամբ, որի համար շնորհակալություն  է հայտնում։

«Հաշվի առնելով, որ ստեղծված իրավիճակում իմ կողմից համայնքի ղեկավարի լիաազորությունների կատարումը հղի է համայնքի հասարական կյանքի ապակայունացման վտանգով՝ ներկայացնում էմ Արմավիրի համայնքապետի լիազորությունների վաղաժամկետ դադարեցման իմ դիմումը»,-ասաց Ռուբեն Խլղթյանը։

Ավագանու անդամների մեծամասնության կողմ քվերակելու արդյունքում քաղաապետի հրաժարականն ընդունվեց։

«Մենք բոլորս Նիկոլ ենք և արդար քայլերով պայքարելու ենք անարդարության դեմ, այս քայլերը լինելու են շարունակական, մինչև հայ ազգը չկառուցի իր երազած Հայաստանը։ Այո՛, մենք քիչ էինք, բայց կարևորը քանակը չի, կարևորը՝ քայլերն արդար լինեն։ Եթե իր գործունեության մեջ անարդարության չլիներ, չէր հրաժարվի»,-ԼՈւՐԵՐ․com-ի թղթակցի հետ զրույցում նկատեց ցուցարարներից մեկը։

Մեր թղթակցի հետ հեռախոսային զրույցի ընթացքում լսվում էին ուրախության ձայներ: Ակտիվիստը պատմեց, որ իրենք տոնում են հաղթանակը և  բարձրախոսներով հայտնում են լուրն այն քաղաքացիներին, ովքեր դեռ չգիտեն։

Հետաքրքիր է, որ քաղաքապետի խոսքում հակասություն կա՝ նա նշում է, որ ցուցարաները քիչ են, արմավիրցիների մեծամասնությունը չի մասնակցում ակցիային, բայց, միևնույն ժամանակ, հրաժարական է տալիս։

Հիշեցնենք, որ մինչ ավագանու նիստը, Արմավիրի մարզպետ Գագիկ Միրիջանյանն ընդունել էր թե՛ ակտիվիստներին, թե՛ քաղաքապետին։ Հանդիպման ընթացքում, արդեն իսկ, Արմավիրի քաղաքապետը հայտնել էր, որ պատրաստվում է հրաժարական տալ։