ՀՀ-ում թրաֆիքինգի վտանգը մեծ է. նոր իշխանություններն անելիք շատ ունեն

Ըստ ԱՄՆ Պետդեպարտամենտի ներկայացրած զեկույցի Հայաստանը լիովին չի իրականացնում թրաֆիքինգը վերացնելու համար անհրաժեշտ քայլերը: Զեկույցում մենք հայտնվել ենք երկրորդ կարգի երկրների շարքում: Առաջին տեղում են այն երկները, որտեղ երևույթի դեմ պայքարը ուժեղ է և թրաֆիքինգը գրեթե իսպառ բացակայում է:

Այս կտրվածքով մենք այդքան էլ վատ վիճակում չենք, սակայն մեզանում կա երևույթը: Ստացվում է, որ դրա դեմ պայքարի առումով ունենք թերացումներ: 

Իրավապաշտպան Զարուհի Հովհաննիսյանը գտնում է, որ թրաֆիքինգի դեմ պայքարի համար «թավշյա հեղափոխությունից» հետո երկրում ստեղծվել են նպաստավոր պայմաններ:

«Որքան երկրում ավել շատ է քրեական տարրերի գործունեությունը և արմատացած է աղքատությունը, այնքան խոցելի է տվյալ երկրի բնակչությունը, և, համապատասխանաբար, մեծ է թրաֆիքինգի ռիսկը: Մենք մինչև այժմ ունենք կալվածատերեր, օլիգարխներ, ովքեր մարդկանց օրահացով, աշխատանքային որևէ իրավունք չպահպանելով աշխատեցնում են. սա նույնպես ստրկության ձև է: Երբ երկրում չկան աշխատատեղեր, մարդիկ ստիպված աշխատանք են փնտրում դրսում, որտեղ խախտվում են մարդու իրավունքերը: Հայաստանում ունեինք ամենաթողություն, օրենքի առաջ անհավասարություն, օրինակ, ժամանակին Մանվել Գրիգորյանը իր տանը ադրբեջանցի ստրուկ էր պահում՝ միջազագային բոլոր իրավունքների խախտումներով:  Ունենք խոցելի խմբեր՝ կանայք, ովքեր իրենց ընտանիքներն ապահովելու համար մեկնում են արտերկիր և պաշտպնավելու համար բավարար գիտելիք չունենալու պատճառով, հայտնվում են հանցավոր խբերի ձեռքում և օգտագործվում են սեռական ծառայություններ մատուցելու նկատառումներով: Երեք ուղղությամբ պետք է պայքարել երևույթը վերացնելու համար. առաջինն արվում է արդեն՝ այն է պետության տարբեր կառույցներում սերտաճած քրեական և օլիգարխիկ խմբերի դեմ պայքար,  երկրորդ՝ աղքատության վերացում և երրորդ՝ իրազեկություն և կրթվածության բարձրացում, որպեսզի մարդիկ լավ տիրապետեն իրենց իրավունքներին»,-  ասաց իրավապաշտպանը:

Նա նաև նկատեց, որ երևույթի դեմ պետք է պայքարել և′ երկրի ներսում, և′ երկրից դուրս:

ԱՄՆ զեկույցը ներկայացվել է այս տարի, սակայն այնտեղ մատնանշվում են անցյալ տարվա ցուցանիշները: Իսկ 2018թ.-ի ցուցանիշները կտեսնենք մյուս տարի: Նկատենք, որ զեկույցում հարևան Ադրբեջանը նույնպես երկրորդ հորիզոնականում է:

Լիլիթ Հակոբյան