Նա ասել է՝ ես ձեզ պարացնելու եմ, չի ասել՝ ուզում է հանդիպել. պարզաբանում սկանդալի մասին

Օրեր առաջ Հայոց ցեղասպանության թանգարան-ինստիտուտի տնօրեն Հայկ Դեմոյանն իր ֆեյսբուքյան էջում գրառում էր կատարել, որ իր բացակայության ժամանակ Կրթության և գիտության նախարար Արայիկ Հարությունյանը և փոխնախարար Հովհաննես Հովհաննիսյանը մտել են թանգարանի վարչական մաս ու նաև տնօրենի աշխատասենյակ, ապա հայտարարել, որ տնօրենի մուտքը ՀՑԹԻ վարչական մաս այլևս արգելված է: Հայկ Դեմոյանը մեղադրանքներ էր հնչեցրել վերջիններիս հասցեին և հայտարարություններ արել: Սրան հետևեցին նաև Արայիկ Հարությունյանի և փոխնախարար Հովհաննես Հովհաննիսյանի պատասխան գրառումները:

Կրթության փոխնախարար Հովհաննես Հովհաննիսյանը «Հայոց ցեղասպանության թանգարան-ինստիտուտ» հիմնադրամի խորհրդի անդրանիկ նիստից հետո լրագրողների հետ զրույցում անդրադառնալով Հայկ Դեմոյանի սկանդալային հայտարարություններին ու մեղադրանքներին՝ նշեց, որ վերջինիս հետ իրենք որևէ խնդիր չեն ունեցել և ինքն անձնապես չի էլ ճանաչում նրան. «Մեր խնդիրը զուտ իրավական ընթացակարգերով, կառավարության կողմից հաստատված կանոնադրության համաձայն՝ տնօրենի ընտրության գործընթացն ապահովելն էր: Մենք խնդիր չենք տեսնում հարցը քննարկելու:

Ուղղակի մի խնդիր էր եղել. պարոն Դեմոյանը գնացել էր Միացյալ նահանգներ և դրանից հետո փաստացիորեն ինքը չէր ղեկավարում թանգարան-ինստիտուտը: Դրանից հետո թանգարան-ինստիտուտի կարգավիճակը փոխվել է կառավարության որոշմամբ, այն դարձել է հիմնադրամ, հաստատվել է հոգաբարձուների խորհուրդ, որը այսօր անցկացրեց իր անդրանիկ նիստը: Պարոն Դեմոյանը, հաշվի առնելով իր վաստակը, ինքը ևս կարող է դիմել տնօրենի թափուր տեղի համար անցկացվող մրցույթին: 

Զգայական, պահի տակ գրված տեքստ էր: Ես կարծում եմ՝ ինքը զղջացել է իր գրածի համար, որովհետև գրել է առանց անձին ճանաչելու ու շփում ունենալու, առանց նրա գիտական վաստակն իմանալու: Ես չէի ուզում նման ոճով գրված նամակին պատասխանել, բայց ի վերջո ընկերներս ասացին՝ դրեք, թող հանրությունը տեսնի: 41 հոդված դրեցի, չնայած հետագայում ավելացրի 5-ը անգլերեն լեզվով, եթե պետք լինի՝ էլի կարող եմ ավելացնել: Անձին պետք է ճանաչել, նոր նման մեղադրանք հնչեցնել»,- պարզաբանեց նա: 

Խոսելով թանգարանի տնօրենի ժամանակավոր պաշտոնակատար Գևորգ Վարդանյանի հրաժարականի մասին և անդրադառնալով տեսակետին, թե նա ճնշումների տակ է հրաժարական տվել, Հովհաննիսյանը նշեց, որ թանգարան-ինստիտուտի շուրջ անառողջ մթնոլորտ էր ստեղծված, որը ճնշումներ էր ենթադրում իրենից. «Գևորգ Վարդանյանը, ով համաձայնել էր լինել ժամանակավոր պաշտոնակատար, շատ անսպասելի հրաժարական է տալիս, ինչը բազմաթիվ ենթադրությունների տեղիք է տալիս, որը հիմնված է որոշակի փաստերի վրա: 

Իսկ Հայկ Դեմոյանը Գիտությունների ազգային ակադեմիայի նախագահին դիմում չի ներկայացրել արձակուրդ գնալու հետ կապված, իսկ ցանկացած աշխատող, երբ արձակուրդ է մեկնում, պարտավոր է դիմում գրել տվյալ հաստատության ղեկավարին: Աշխատանքային կարգը խախտվել է: Եթե Հայկ Դեմոյանը ցանկություն ունենա հանդիպելու, ապա մենք պատրաստ ենք: Նա ասել է՝ «ես ձեզ պարացնելու եմ», չի ասել՝ ուզում է հանդիպել»,- հայտարարեց նա:

Հիշեցնենք՝ օրեր առաջ լրատվամիջոցների և ֆեյսբուքահայության ուշադրության կենտրոնում էր հայտնվել Հայոց ցեղասպանության թանգարան-ինստիտուտի նախկին տնօրեն Հայկ Դեմոյանի և ԿԳՆ Արայիկ Հարությունյանի ու փոխնախարար Հովհաննես Հովհաննիսյանի «հակամարտությունը»:

Ամեն ինչ սկսվեց Հայկ Դեմոյանի սկանդալային հայտարարությունից, որը հրապարակվեց ֆեյսբուքյան իր էջում.

«Գործուղման մեկնելուց առաջ սենյակում էի թողել անձնական իրերս, համակարգիչը, Միացյալ Նահանգներից բերված, սակայն մշակման փուլում գտնվող թանգարանային արժեքներ: Այնուհետև այս երկու հայախոս օրգանիզմները, ովքեր, ի դեպ ՀՑԹԻ անձնակազմի միաձայն որոշումով, հրավիրվել էին թանգարան՝ լրատվամիջոցների ներկայությամբ առկա խնդրահարույց հարցերը համատեղ քննարկելու համար, փոխանակ տեղեկանալու, թե ինչ խնդիրներ կան, բացահայտ ու անթաքույց հովանավորչություն դրսևորելով, փորձել են անձնակազմի շրջանում ստահոդ լուրեր տարածել՝ հոխորտալով, թե իմ մուտքը ՀՑԹԻ վարչական մաս այլևս արգելված է»:

Հայկ Դեմոյանը հայտարարեց նաև ՀՑԹԻ-ում ԿԳ նախարարի ու փոխնախարարի հովանավորյալի մասին, որն, ըստ նրա, «այլանդակություններ» է իրականացրել և խաթարել հուշահամալիրի ընդհանուր անվտանգությունը:

«Արայի՛կ, իսկ դու մեկ էջի սահմաններում ներկայացրու քո հովանավորյալի հետ 1998թ. Դամասկոսում չորս ամիս տևած մերձեցման մանրամասնությունները, որպեսզի հանրության շրջանում մութ կետեր չմնան քո հովանավորչության ու կոռուպցիոն գործելաոճի մասով: Ի դեպ, նա հինգ ամիս շարունակ չի ներկայացել աշխատանքի, սակայն բացակա օրերի փոխարեն ստորագրելով աշխատավարձ է ստացել: Այս կապակցությամբ առկա են երկու զեկուցագրեր, որոնք տրամադրվել են ԿԳՆ աշխատակազմի ղեկավարին, բայց որքան հասկանում եմ, դա քեզ չի հետաքրքրել թանգարան ներխուժելու ժամանակ… Հաջորդիվ կլինեն նոր հանձնարարություններ, չթուլանաք հանկարծ ու մի՛ հաբռգեք….

Անդրադառնալով այս հայտարարությանը՝ Արայիկ Հարությունյանը այն որակեց անմակարդակություն: Նա հավելեց նաև՝ Դեմոյանն, այլևս չլինելով տնօրեն, զավթել է տնօրենի աշխատասենյակը, ինչ-որ նիստեր գումարել, անձնակազմի անունից ուղերձներ հղել: Նախարարին նաև տեղեկացրել են, որ Դեմոյանն այդ ընթացքում օգտագործել է տնօրենի համար նախատեսված ծառայողական ավտոմեքենան:

«Մենք պարզապես զգուշացրել ենք՝ այն ինչ անում է ինքը, հակաօրինական է, նախարարությունը և իշխանությունը բոլոր իրավունքներն ունեն դիմելու իրավապահներին այդ հակաիրավական գործողություններին վերջ տալու համար: Մենք դիմելու ենք իրավապահներին»,- հայտարարել էր Հարությունյանը:

Սրան հետևեց Հայկ Դեմոյանի նոր հայտարարությունը, այս անգամ՝ ԿԳ փոխնախարար Հովհաննես Հովհաննիսյանի կենսագրության մանրամասների մասին. «Կրթության և գիտության փոխնախարար Հովհաննես Հովհաննիսյանը, մեր խնդրանքին ընդառաջ գնալով, ներկայացրել է 42 միավոր հրապարակումներից բաղկացած մի ցանկ (մենք խնդրել էինք ներկայացնել առնվազն 41-ը): Ցանկին ծանոթանալով՝ պարզ դարձավ, որ ԿԳ փոխնախարարը ԿԳՆ կայքէջում տեղադրված իր պաշտոնական կենսագրականում հիշատակված «քառասունից ավելի գիտական հոդված»-ների մեջ մի կերպ խցկել է իր միակ մենագրությունը, զեկույցի թեզեր, ոչ գիտական համարվող պարբերականներում լույս տեսած հոդվածներ, ինչպես նաև մեթոդական ձեռնարկ:

Պարոն Հովհաննիսյան, կամ տարբերակում ենք «գիտական հոդված» ու «գիտական հրապարակում» կոչվածները, կամ էլ համեստաբար գրում ենք «մեկ մենագրություն և երեսունից ավելի գիտական հոդվածներ»: 

Կենսագրականի շտկման հեղինակային իրավունքներն ինձ չեմ վերապահում»,-գրել էր Դեմոյանը:

Սոնա Հարությունյան