Միլիոնատեր օֆշորիստի ապագան կանխորոշվա՞ծ է

Վերլուծական 3 Հուլիս, 2018 19:22

ՀՀ նախկին գլխավոր հարկադիր կատարող, արդարադատության գեներալ-մայոր Միհրան Պողոսյանը խորը արմատներ է գցել օֆշորային գոտիներում։ Այնտեղ գրանցած ընկերությունների միջոցով նա տարիներ շարունակ բիզնես էր անում և պահում իր պաշտոնը: Համաձայն գաղտնազերծված փաստաթղթերի՝ ՀՀ նախկին գլխավոր հարկադիր կատարողը բաժնետեր է Պանամայում գրանցված երեք ընկերությունների՝ «Սիգթեմ ռեալ իսթեյթ ինքորփորեյթիդ» (Sigtem Real Estates Incorporated) «Հոփքինթեն թրեյդինգ ինքորփորեյթինգ

(Hopkinten Trading Incorporated) «Բանջիո ինվեստ» ԲԸ (BANGIO INVEST S.A.): Բացահայտված փաստերով հարուցվեց քրեական գործ, սկսվեց նախաքննություն, որը, սակայն, ավելի ուշ՝ դատարանի որոշմամբ կարճվեց։ Ամիսներ տեւող քննությունից ակհայտ էր, որ իրականում քննություն չի տարվում, որովհետեւ ՀՔԾ-ն ցանկություն չուներ ձեռք բերել «Պանամայի փաստաթղթերի» փաթեթը (Միհրան Պողոսյանի ընկերություններին վերաբերող հարյուրավոր փաստաթղթեր, էլեկտրոնային նամակագրություններ...)։

Եւ պարզ էր, որ ինչ-որ փուլում գործը պիտի կարճվեր: Ամենահարմար փուլը մոտեցավ եւ արագացրեց ՀՔԾ-ի կողմից քրեական գործի կարճման որոշման կայացումը։ Միհրան Պողոսյանի անունը որոշ ժամանակ անց տեղ գտավ իշխող Հանրապետական կուսակցության նախընտրական ցուցակում։ Տպավորություն է, որ Պողոսյանի գործած օրինախախտումներն այնքան շատ էին, որ նախկին իշխանություններն ընտրողաբար են մոտեցել դրանք բացահայտելու և պատժելու գործին: Հիշում եք, չէ՞, երբ ԴԱՀԿ պետին պատկանող սպիտակ գույնի ZAZ («Զապորոժեց») մակնիշի 55UL333 մեքենայի վարորդը Սևան-Երևան մայրուղում երթևեկել էր 153 կմ/ժ արագությամբ, ինչի արդյունքում տուգանվել է 200 հազար դրամով։ Միհրան Պողոսյանը, սակայն, չի մուծել տուգանքը: Հիշյալ միջադեպի ամենազարմանալի դրվագն այն չէ, որ Քեթրինի Միհրանը տուգանք չի տալիս, այլ այն, որ «Զապորոժեցը» կարող էր նման արագություն զարգացնել ու դեռ դրա ղեկին էլ կարող էր լինել երկրի ամենահարուստ մարդկանցից մեկը: Օֆշորային պատմությունների խորամանկ հերոսը շատ ավելի մեծ մեքենայություններ է արել, քան կարող է լինել Range Rover-ը «Զապորոժեց» ներկայացնելը: Այնպես որ, Միհրանի ընթացքն անկասելի է 153 կմ/ժ արագությամբ և դեռ դրանից էլ սրընթաց:

Հայաստանում տեղի ունեցած փոփոխությունները ստիպում են այլ անկյան տակ նայել Պողոսյանի գործած մեծ ու փոքր հանցանքներին, և այս տեսանկյունից՝ առաջնային է դառնում Օֆշորի գործի վերաբացումը: Գուցե իրավապահ մարմիններն արդեն մտածում են այդ ուղղությամբ և դա է պատճառը, որ օրեր շարունակ՝ մամուլում Պողոսյանին պատգամավորական անձեռնմխելիությունից զրկելու մտադրության մասին տեղեկություններ են տարածվում: Միհրան Պողոսյանի պարագայում եւս առաջ կգա չհայտարարագրված սեփականության հարցը, սակայն տվյալ դեպքում խնդիրը նրա անձը չէ: Խնդիրը օֆշորային տիրույթն է, որը կարող է դառնալ նախադեպ, նկատի առնելով Հայաստանում խոշոր նախագծերում օֆշորային ընկերությունների ու օֆշորային հաշիվներ ունեցող անձանց ներգրավվածությունը:

Ստելլա Խաչատրյան