Հանցավոր համաձայնություն՝ ոռոգման ջուր տվողների և ցիստեռներով ջուր վաճառողների միջև

Ինչպես արդեն տեղեկացրել ենք՝ ԼՈւՐԵՐ.com-ը բազմաթիվ ահազանգեր է ստանում «Վեոլիա Ջրի» մատակարարման հետ կապված խնդիրների վերաբերյալ: Այս անգամ էլ մեզ դիմած՝ Ձորաղբյուրի ամառանոցի բնակիչները բողոքում են՝ թավշյա հեղափոխությունը չի հասել իրենց մոտ:

Նրանք հայտնում են, որ կրկին ոռոգման ջուր չունեն և այսպես այլևս չեն կարողանում ապրել. «Սա սխալ է, միգուցե նաև` հանցավոր սխալ: Բոլորը գիտեն, որ ծառերն ու թփերը ջրի կարիք ունեն: Հատկապես՝ ամռանը: Սակայն այս պարզ ճշմարտությունը ոչ մի կերպ չի հասնում որոշ դդմագլուխների, ովքեր զբաղվում են ոռոգման ջուր հատկացնելով: Ոլորտի տեղային պատասխանատուներն ամեն տարի լուրջ դեմքով «գտնում են» ամիսներով ջուր չտալու արդարացումը. «Խափանվել է շարժիչը», «հիվանդացել է պոմպը», «Հիտլերը տեղում չէ»»,- դժգոհում են բնակիչները:

Արդյունքում, ինչպես նշում են ամառանոցի բնակիչները, ստիպված են ցիստեռներով ջուր գնել՝ այգիները կործանումից փրկելու համար, ինչը «թանկ հաճույք է». «1 ցիստեռ ջուրն առիթից օգտվող հմուտ ձեռներեցները վաճառում են 10.000 դրամով (7 տոննա) կամ 15.000 դրամով (10 տոննա): Այս ամենը շատ նման է հանցավոր պայմանավորվածության՝ ոռոգման ջուր հատկացնողների և ցիստեռով ջուր վաճառողների միջև: Ոլորտի պատասխանատուները լուրջ անելիքներ ունեն այս ուղղությամբ: Թավշյա հեղափոխությունից հետո Հայաստանում այգիներն ու ծառերը մերժում են գոյատևել առանց ջրի»,- ասում են նրանք՝ պնդելով, որ շարունակում է գործել հանցավոր համաձայնություն ոռոգման ջուր տվողների և ցիստեռներով ջուր վաճառողների միջև:

Ավելի վաղ ԼՈւՐԵՐ.com-ը տեղեկացրել էր՝ մասսայական ջրանջատումների վերաբերյալ պարզաբանումներ է տվել «Վեոլիա Ջուր» ընկերության գլխավոր տնօրեն Կրիստիան Լըֆեն: Նա մասնավորապես ասել է. «Պոմպոկայանում մենք ունեցել ենք վթար և զազանազան ավելի փոքր վթարներ, որոնք տեղի են ունեցել մայր ջրատարի վրա։ Ուրբաթ օրվանից աշխատել ենք, որպեսզի կարողանանք լիովին վերահսկել իրավիճակը։ Միակ ուղերձն այն է, որպեսզի բաժանորդները խնայեն ջուրը և չմսխեն, այսօր կա արդեն գերսպառումը և վատնումն անթույլատրելի է»,- ասել էր Լըֆեն։

Սոնա Հարությունյան