Էթիկայի հանձնաժողովի պաշտոնական կայքում սխալմունք է եղել,որն արդեն ուղղվել է. «Փաստ»

«Փաստ» օրաթերթը գրում է.

«Փաստը» հունիսի 27–ի համարում անդրադարձել էր ՀՀ նախագահի խորհրդական Շահեն Ավագյանի հայտարարագրին: «Շահեն Ավագյանը երեք անշարժ գույք ունի, որից մեկը՝ բազմաբնակարան շենք» վերնագրով նյութում, հիմք ընդունելով Բարձրաստիճան պաշտոնատար անձանց էթիկայի հանձնաժողովի հրապարակած հայտարարագիրը, նշել էինք. «Արտգործնախարարության գլխավոր քարտուղարի պաշտոնից ազատվելու կապակցությամբ Բարձրաստիճան պաշտոնատար անձանց էթիկայի հանձնաժողովին ներկայացված 2018 թ. պաշտոնը դադարեցնելու հայտարարագրում նշել է երեք անշարժ գույքի սեփականատեր լինելու մասին: Այսպես, նրան են պատկանում մեկական այգետնակ, բնակարան և բազմաբնակարան բնակելի շենք»:

«Հանձնաժողովի ethics.am կայքում հրապարակված հայտարարագրում վրիպակ է եղել այն սյունակում, որը բնակարաններին, անշարժ գույքին է վերաբերում: Արդյունքում այնպես է ստացվել, որ ես նույն բազմաբնակարան շենքում մի քանի բնակարան ունեմ: Դա սխալմունք է եղել:Բարձրաստիճան պաշտոնատար անձանց էթիկայի հանձնաժողովի պաշտոնական կայքում ուղղումն արդեն կատարվել է, հուլիսի 3–ին իրենք ճիշտ տարբերակն են հրապարակել»,–ասաց նա` հավելելով, որ այդ շենքում միայն մի բնակարան ունի: