Ֆրանսիայի հայկական հիմնադրամն արձագանքել է «Հայաստան» հիմնադրամի գործադիր տնօրեն Արա Վարդանյանի ձերբակալությանը

«Հայաստան» համահայկական հիմնադրամի ֆրանսիական ճյուղը՝ Ֆրանսիայի հայկական հիմնադրամը, ընդգծել է կառույցի նկատմամբ վստահության վերականգնման անհրաժեշտությունը՝ հայտնելով, որ մեծ վրդովմունքով է տեղեկացել «Հայաստան» հիմնադրամի գործադիր տնօրեն Արա Վարդանյանի ձերբակալության մասին և ներկայացրել է ԱԱԾ-ի ավելի վաղ հրապարակած բացահայտումները։

Հիմնադրամը նշում է, որ անշուշտ անհրաժեշտ է հարգել անմեղության կանխավարկածը և սպասել հետաքննության ավարտին և արդարության վերականգնմանը:

«Այնուամենայնիվ, եթե Արա Վարդանյանի նկատմամբ փաստերն ապացուցվեն, դրանք վնաս կհասցնեն կազմակերպությանը, որը վայելել է ամբողջ աշխարհից տասնյակ հազարավոր դոնորների վստահությունը և որն ավելի քան 25 տարի աշխատել է մեծամասշտաբ սոցիալ-տնտեսական զարգացման նախագծերի ուղղությամբ, որոնցից այժմ օգտվում են հարյուր հազարավոր մարդիկ Հայաստանում և Արցախում»,- ասված է հայտարարությունում:

Նվիրատուների վստահությունը պետք է շտապ և ամբողջապես վերականգնվի, նշել են հիմնադրամում՝ հավելելով, որ այդ վստահության շնորհիվ է, որ հիմնադրամը կարողացել է մասնակցել 1988 թվականի երկրաշարժի ավերածությունների վերականգնման աշխատանքներին, 1993 թվականին Ադրբեջանի և Թուրքիայի կողմից արգելափակման ազդեցությունը նվազեցնելուն ուղղված ջանքերին, 1995 թվականից Արցախի վերականգնմանը, ենթակառուցվածքների մեծ ցանցի ստեղծմանը և 2009 թվականից վերապատրաստումների ծրագրերի և գյուղատնտեսական նախագծերի իրականացմանը, վերջերս Հայաստանում ու Արցախում արևային էներգիայի ծրագրերի զարգացմանը:

Հիմնադրամի առաքելությունը դեռ ավարտված չէ, քանի որ բազմաթիվ խնդիրներ կան, հայտնել են կառույցից: Մի մարդու գործողությունները չպետք է մոռացության մատնեն հիմնադրամի կատարած հսկայական աշխատանքը, ոչ էլ խոչընդոտել նրան, որ այն շարունակի կատարել իր առջև դրված խնդիրները:

«Ֆրանսիայի հայկական հիմնադրամը ցանկանում է ընդգծել, որ իր կողմից ստացված բոլոր նվիրատվություններն օգտագործվել են նախատեսված նախագծերի համար և որ այն անմիջականորեն է վերահսկում 2009 թվականից գործարկված նախագծերը: Հիմնադրամը կաշխատի Հայաստանում «Թավշյա հեղափոխության» կառավարության հետ համաձայնությամբ, որն իր առաջնահերթություն է հռչակել կոռուպցիայի դեմ պայքարը, և աշխարհում հիմնադրամի այլ ճյուղերի հետ միասին՝ անելու համար իր լիազորությունների մեջ մտնող ամեն բան այս տխուր էջը շրջելու, վստահությունը վերականգնելու, հիմնադրամի գործունեությունը նախկինից է՛լ ավելի մեծ եռանդով շարունակելու համար»,- ասված է հայտարարությունում:

Ֆրանսիայի հայկական հիմնադրամը կոչ է արել իր կամավորներին, դոնորներին օգնել տարածել հաղորդագրությունը: