ՀՀԿ-ն փրփուրներից է կախվում.Դավիթ Հարությունյանի «փայլուն» առաջարկը

ՀՀԿ-ն նախատեսել է տեխնիկական սարքերով ընտրողների գրանցումը միմիայն նույնականացման քարտերի միջոցով: Այս մասին, այսօր՝ հուլիսի 4-ին, Ընտրական օրենսգրքի շուրջ ձեւավորված ԱԺ աշխատանքային խմբի առաջին նիստի ժամանակ նշեց ՀՀԿ ներկայացուցիչ Դավիթ Հարությունյանը: Տպավորություն կարող է ստեղծվել, որ նախկին իշխանությունները արդար ու թափանցիկ ընտրությունների գլխավար շահառուներն են հանդիսանում և այդ իսկ պատճառով ձեռ ու ոտ են ընկել, մտածում են ինչպես օժանդակեն նոր իշխանություններին ՝ այդ դժվարին գործընթացում: Իհարկե նման մտայնությունը կեղծ է: ՀՀԿ-ն ընդամենը մեկ ցանկություն և նպատակ է հետապնդում՝ որքան հնարավոր է հետաձգել արտահերթ ընտրությունների անցկացումը: 

Դժվար է ասել ինչպես է հանրապետականներին հաջողվել Վենետիկի հանձնաժողովում այդքան արդյունավետ լոբբինգ իրականացնել, սակայն փաստը մնում է փաստ՝ հանձնաժողովը հակված է ՀՀԿ առաջարկությունները ընդունելուն: Իսկ դա նշանակում է , որ հանրապետականները կկատարեն իրենց մինիմալ ծրագիրը, որովհետև պարզից էլ պարզ է՝ մինչև ԵՄ գումար տրամադրի, մինչև խնամի-ծանոթ –բարեկամ շղթայի միջոցով որոշվի թե որ կազմակերպությունն է տպելու այդ քարտերը, մինչև տպեն, բաժանեն Հայաստանի ոջ բնակչությանը՝ արտահերթի մասին հնարավոր կլինի խոսել միայն 2019-ի գարնանը, եթե ոչ ավելի ուշ: Ընդ որում ըստ Դավիթ Հարությունյանի՝ սա գաղափար է որը նվեր է տրվում կառավարությանը: Իհարկե, կառավարությունում որևէ կերպ գլխի չէին ընկնի դիմել միջազգային փորձին և պեղել ID քարտերի արդյունավետության մասին մի քանի բոցաշունչ օրինակներ: Գլխի կընկնեին, պարզապես կառավարության և Դավիթ Հարությունյանի նպատակները տրամագծորեն տարբեր են: Եթե Փաշինյանի կառավարությունը փորձում է օր առաջ անցկացնել արտահերթ խորհրդարանական ընտրությունները ՝ երկիրը ստեղծված սահմանադրական և քաղաքական ճգնաժամից դուրս բերելու համար, ապա ՀՀԿ-ն իր փայլուն առաջարկներով և նվերներով ընդամենը փրփուրներից է կախվում…

Ստելլա Խաչատրյան