Արյունաբանական կենտրոնի մեքենաների ճակատագիրը

Հայ քաղաքական գործիչները, կարծես, սովորույթ ունեն խոսելու ծառայողական մեքենաների կրճատման մասին։ Երբ Կարեն Կարապետյանն եկավ իշխանության բարձրացրեց այս հարցը։ ՀՀ-ում, սակայն,  ծառայողական մեքենաների թիվը միշտ մոտ է եղել 1000-ին, մինչդեռ, օրինակ, Եվրոպական որոշ երկրներում այդ թիվը հազիվ հասնում է 20-ի։

Նոր իրականության մեջ մեքենաների կրճատման հարցը բաձրացրեց առաջին փոխվարչապետ Արարատ Միրզոյանը։

Այս օրերին էլ իր ֆեյսբուքյան էջում մեքենաների հարցին, այլ ձևաչափով, անդրադարձել էր նաև Առողջապահության նախարար Արսեն Թորոսյանը։

Նա, մասնավորապես, գրում է․ «Հետաքրքիր է՝ քանի երեխայի կարելի էր կատարել ոսկրածուծի տրանսպլանտացիա այն 25 մլն դրամով, որը ծախսվել է արյունաբական կենտրոնի այս երկու մեքենաների ձեռք բերման համար։ Nissan X Trail 2012 14.990.000, Nissan Kicks 2017 10.300.000»։

Պարզելու համար, թե ինչ կլինի վերոնշյալ մեքենաների ճակատագիրը ԼՈւՐԵՐ․com-ի թղթակիցը զրուցեց Առողջապահության նախարարության մամլո խոսնակ Լիանա Եղիազարյանի հետ: Վերջինս փոխանցեց Արսեն Թորոսյանի կարծիքը, հաձայն որի՝ մեքենաներից մեկը կտրամադրվի ինչ-որ հիմնարկի, որը դրա կարիքը կունենա, իսկ մյուսի ճակատագիրը դեռ անհայտ է։

Հետաքրքվեցինք նաև՝  հնարավո՞ր է մյուսն էլ աճուրդով վաճառվի, Եղիազարյանը բացասական պատասխան տվեց՝ պատճառաբանելով, որ վաճառելու համար մեքենաները հին են։

Նկատենք, որ ժամանակին՝ նոր կառավարության առաջին նիստում, Արսեն Թորոսյանը որպես օրակարգային հարց էր ներկայացրել իր նախարարությանը երկու մեքենա տրամադրելու հարցը, ինչն իրականացվել էր։