Արա Վարդանյանը գումարներ չի յուրացրել․ փաստաբան

Հուլիսի 3-ին ԱԱԾ-ն հայտարարություն տարածեց «Հայաստան» համահայկական հիմնադրամի տնօրեն Արա Վարդանյանի ձերբակալության մասին: Ըստ պաշտոնական տեղեկատվության, միայն վերջին շաբաթվա ընթացքում Վարդանյանը հիմնադրամի բանկային քարտից մոտ 14 միլիոն ՀՀ դրամ է փոխանցել օնլայն խաղատներին, իսկ 2016–ից 2018 թվականներն ընկած ժամանակահատվածում այդ գումարը կազմել է շուրջ 130 000 000 մլն ՀՀ դրամ:

Արա Վարդանյանի փաստաբան Երվանդ Վարոսյանը հարցի վերաբերյալ այլ մեկնաբանություն ունի։

«Թյուր տեղեկատվություն էր տարածվել այն մասին, որ «Հայաստան» համահայկական հիմնադրամի գումարները վատնվում են, դրանցով խաղադրույքներ են կատարվում․ արդյունքում տպավորություն էր ստեղծվել, որ յուրացման հետ գործ ունենք, մինչդեռ, սա իրականությանը չի համապատասխանում։ Հիմնադրամի համար վարկային գիծ է բացված եղել, որը տնօրինել է Արա Վարդանյանը և եղել են դեպքեր, որ այդ վարկային գծից ինքը նախօրոք իր անձնական միջոցներից գումար է մուտք արել կամ քարտով փոխանցումներ կատարել, բայց մի քանի օր անց վերադարձրել այդ գումարը տվյալ բանկի հաշվին։ Սա, բնականաբար, հիմնադրամի միջոցների հետ կապ չունի»,-ասաց փաստաբանը։

ԼՈւՐԵՐ.com-ի թղթակցի այն հարցին, թե Վարդանյանին փողային յուրացումների հետ կապված որևէ մեղադրանք չի՞ առաջադրվել, փաստաբանը բացասական պատասխան տվեց՝ նշելով, որ իր պաշտպանյալին մեղադրանք է առաջադրվել քրեական օրենսգրքի 214 հոդվածի 1-ին մասով միայն։

Ստորև ներկայացնում ենք քրեական օրենսգրքի վերոնշյալ հոդվածը․ 

Հոդված 214. Առեւտրային կամ այլ կազմակերպությունների ծառայողների կողմից լիազորությունները չարաշահելը

1. Առեւտրային կամ այլ կազմակերպությունների ծառայողների կողմից իրենց կարգադրիչ կամ այլ լիազորություններն այդ կազմակերպության շահերին հակառակ եւ իր կամ ուրիշ անձանց օգտին օգտագործելու կամ առավելություններ ձեռք բերելու կամ այլ անձանց վնաս պատճառելու նպատակով օգտագործելը, եթե անձանց, կազմակերպությունների կամ պետության իրավունքներին ու օրինական շահերին էական վնաս է պատճառվել՝

պատժվում է տուգանքով՝ նվազագույն աշխատավարձի երկուհարյուրապատիկից չորսհարյուրապատիկի չափով, կամ ուղղիչ աշխատանքներով՝ մեկից երկու տարի ժամկետով, կամ կալանքով՝ մեկից երեք ամիս ժամկետով, կամ ազատազրկմամբ՝ առավելագույնը երկու տարի ժամկետով:

Լիլիթ Հակոբյան