Նադեժդա Սարգսյանը երգարվեստի գույներից մեկն էր, վառ անհատականություն

 Երևանի Կոնդ թաղամասի Սուրբ Հովհաննես եկեղեցում՝ հուլիսի 4-ին, տեղի ունեցավ Նադեժդա Սարգսյանի հոգեհանգստյան արարողությունը:

 ՀՀ վաստակավոր արտիստ, երգչուհի Նադեժդա Սարգսյանի հոգեհանգստի արարողությանը եկել էր ՀՀ վարչապետ Նիկոլ Փաշինյանի կինը՝ Աննա Հակոբյանը:

Արարողությանը ներկա էին բազմաթիվ մտավորականներ, արվեստի գործիչներ, ընկերներ՝ Վազգեն Ասատրյանը, Մարտին Վարդազարյանը, Արամոն, Երվանդ Երզնկյանը, Ռադիկ Գաբրիելյանը, Հայկոն, իր կնոջ՝ Անահիտ Սիմոնյանի հետ:

Երգիչ Արամոն «Արմենպրես»-ի հետ զրույցում ընդգծեց Նադեժդա Սարգսյանը մեծ ավանդ ունի հայ էստրադային երգարվեստի մեջ: 

«Մեր կյանքից կամաց-կամաց հեռանում է մի հիանալի սերունդ՝ Գեորգի Մինասյան, Էլվինա Մակարյան, Նադեժդա Սարգսյան: Նրանք պրոֆեսիոնալների բացառիկ համաստեղություն են և իրենց գործի վարպետներ: Շատ եմ ցավում, քանի որ Նադյան մեծ ավանդ ունի  հայ էստրադային երգարվեստի մեջ:  Բացի երգչուհի լինելուց, նա նաև մանկավարժական գործունեությամբ է զբաղվել և բազմաթիվ սերունդներ կան, որ նրա դպրոցի շնորհիվ մեծ բեմեր են գրավել: Ես 32 տարի է ինչ ճանաչում եմ Նադյային ու ես դեռ պատանի էի, երբ ընդունվեցի Օրբելյանի օրկեստր, իրենք էլ մեր բակում էին ապրում: Նադեժդայի ամուսնու՝ Դավիթ Բեջանյանի հետ, մենք շատ լավ հարաբերությունների մեջ ենք եղել»,- նշեց Արամոն և հավելեց նաև, որ երգչուհին իր գործի նվիրյալն էր:

Կոմպոզիտոր, դիրիժոր Երվանդ Երզնկյանն էլ հիշեց Նադեժդա Սարգսյանի հետ իրենց երկար տարիների շփումն ու ընկերությունը:

«Նախկինում Երևանում ինքնուս երգիչներ ու ինքնագործ խմբեր կային, բայց դրանք շատ բարձր մակարդակ ունեին, հետագայում էլ դարձան պրոֆեսիոնալ: Հենց նմանատիպ խմբից էլ՝ «Սերպանտին» վոկալ-գործիքային անսամբլ անվանմամբ, դուրս եկավ Նադյան: Այսինքն,  ես նրան դեռևս 1970-ականներից եմ ճանաչում»,- ասաց Երզնկյանը:

Նադյային, ինչպես իրեն ընկերներն էին ներկայացնում, բոլորը որպես վառ անհատականություն են հիշում:

Նաիրի բժշկական կենտրոնում՝ հուլիսի 2-ին, երկարատև ծանր հիվանդությունից մահացել է ՀՀ վաստակավոր արտիստ, երգչուհի Նադեժդա Սարգսյանը: Նադեժդա Սարգսյանը 1971 թվականին ավարտել է Հայֆիլմի կինոդերասանի ստուդիան, 1992 թվականին՝ Մոսկվայի թատերարվեստի ինստիտուտը։ 1973-1978 թթ.` «Սերպանտին» վոկալ-գործիքային անսամբլի, 1978-1987 թթ.` Հայաստանի պետական էստրադային նվագախմբի մենակատար, 1988-1992 թթ՝ «Հայեր» անսամբլի և մշակութային կենտրոնի գեղարվեստական ղեկավար, 1992 թվականից, միաժամանակ՝ «Էնի Բի» պրոդյուսերական կենտրոնի տնօրեն, «Դո-ռե-մի» մրցույթի և վոկալ ստուդիայի հիմնադիր և գեղարվեստական ղեկավար, 2003 թվականից՝ Երևանի մշակույթի պետական քոլեջի տնօրեն։

1995-1999 թթ. եղել է ՀՀ Ազգային Ժողովի պատգամավոր, ֆինանսավարկային, բյուջետային և տնտեսական հարցերի մշտական հանձնաժողովի անդամ։ 2007 թվականից Հայաստանի Հանրային հեռուստաընկերությունում եղել է բազմաթիվ նախագծերի պրոդյուսեր՝ «Տարեմուտի երեկո 2008», «Երկու աստղ» և այլն։ 2008-2009 թթ. եղել է «Մանկական Եվրատեսիլ» և «Նոր ալիք» երգի միջազգային մրցույթների Հայաստանը ներկայացնող պրոդյուսեր, նաև ընդգրկվել է Հանրային խորհրդի «Կրոնի, սփյուռքի և միջազգային ինտեգրման» հանձնաժողովում։ Հյուրախաղերով եղել է աշխարհի 40 երկրներում։ Երգացանկում են՝ Կոնստանտին Օրբելյանի, Ռոբերտ Ամիրխանյանի, Մելիք Մավիսակալյանի, Արամ Սաթյանի, Ստեփան Շաքարյանի և այլոց երգերից:

Նադեժդա Սարգսյանը 63 տարեկան էր: