Ե՞րբ է եղել, որ մեր ժողովուրդը «կագեբեին» նայի որպես փրկարարի. Արամ Մանուկյան

Այսօր ԱԺ նախկին պատգամավոր, ՀԱԿ փոխնախագահ Արամ Մանուկյանը Մարտի 1-ի վերաբերյալ տեղի ունեցած քննարկման ժամանակ դրական գնահատեց Մարտի 1-ի բացահայտման ուղղությամբ տարվող, իր իսկ սահմանմամբ, «նոր որակի» քրեական գործը։

«Նոր որակի իմաստը հետևյալն է․ այն ամենը, ինչ որ տեղի է ունեցել՝ ընտրությունների կեղծիքներ, մարդկանց ձերբակալություններ, խեղանդամ դարձնել՝ տեղի են ունեցել իշխանություն զավթելու համար։ Անգամ այդ 10 սպանությունները, ոճրագործությունները՝ միջոց են եղել սահմանադրական կարգը տապալելու և իշխանությունը զավթելու համար»,-ասաց Մանուկյանը։

Արամ Մանուկյանի խոսքերով, եթե չլիներ ժողվրդի աջակցությունը նոր իշխանություններին, ապա Մարտի 1-ի գործը մնալու էր դարակում։ Գործի թե′ սկիզբը, թե′ ներկա իրավիճակը, Մանուկյանը միայն քաղաքական իրադարձությունների հետ է կապում։

«Մենք միշտ ասել ենք, որ իշխանության փոփոխության արդյունքում միայն կարող է Մարտի 1-ը բացահայտվել, էստեղ լուծումը էլի իրավական չէ։ Էս կառավարության գալու արդյունքում է միայն Մարտի 1-ն ընթացք ստացել»,-նշեց նա։

Արամ Մանուկյանն անդրադարձավ նաև նոր իրավիճակում իրավապահ մարմիների ազատագրմանը։

«Կագեբեն հիմա դարձել է Ազգային անվտանգություն։ Ե՞րբ է եղել, որ մեր ժողովոուրդը «կագեբեին» նայի որպես փրկարարի։ Ամեն օր դրական լիցք, դրական ինֆորմացիա է տալիս»,-նկատեց  ՀԱԿ փոխնախագահը։