Արթուր Գևորգյանը չի թաքցնում իր հակասությունները Գագիկ Ծառուկյանի հետ

«Չեմ կարող ասել՝ իրականում ինչ է տեղի ունեցել, որովհետև «Օլիմպավան»-ում ներկա չեմ եղել: Գործը վարույթում է, իրավապահների հսկողության տակ, կպարզվի և կլինի հայտարարություն, իսկ երևույթը տգեղ է»,- այս մասին այսօր ՀԲՖ համաժողովում հայտարարեց Հայաստանի բռնցքամարտի ֆեդերացիայի նախագահ Արթուր Գևորգյանը՝ անդրադառնալով օրեր առաջ «Օլիմպավան»-ում տեղի ունեցած միջադեպին, որից հետո հիվանդանոցում հայտնված անձը ցուցմունք էր տվել Գագիկ Ծառուկյանի և նրա թիկնազորի պետ Էդուարդ Բաբայանի դեմ:

Նկատենք, որ հետագայում ցուցմունք տված անձը հրաժարվել էր ցուցմունքից՝ նշելով, որ մարմնական վնասվածքները ստացել է սայթաքել-ընկնելու հետևանքով: Այս դեպքում, չգիտես ինչու, Էդուարդ Բաբայանը շարունակում է մնալ փակի տակ:

«Որքան գիտեմ բռնցքամարտիկ Նիկոլ Արությունովը բանակային տարիքում է և գտնվում է Ռուսաստանում: Վերադառնալով Հայաստան, նա պարտավոր է գնալ ծառայել, իսկ թե ինչու չի գնում ծառայելու, ինչու չի ներկայանում, դա իր ծնողի խնդիրն է։ Ես կողմ եմ, որ պետք է ծառայի. եթե աշխարհի չեմպիոնը, մարզիկը չծառայի, էլ ո՞վ ծառայի։ Քանի դեռ մարզական ընթացքի մեջ է, ամեն օր արդյունքներ է ցույց տալիս, ճիշտ է, որ չծառայ, բայց եթե խաղից դուրս է եկել, պետք է գնա ծառայության»,- ասաց Գևորգյանը:

Նա նշեց՝ հայտարարեց մինչև կազմակերպության ղեկավարի հաջորդ ընտրությունը մեկ ամսով դադարեցնում է ֆեդերացիայի նախագահի պաշտոնավարումը.

«Հաջորդ ընտրություններին կմասնակցեմ արդեն ոչ թե ֆեդերացիայի նախագահի, այլ որպես նոր առաջադրվող թեկնածու կարգավիճակում, նոր ծրագրով, որպեսզի այն առավելությունը, որն ունի գործող նախագահը, չունենամ, այլ լինի հավասար մրցակցային դաշտ: Ակնկալում եմ, որ այս մեկ ամսվա ընթացքում նոր թեկնածուներ կլինեն: Եթե կան հայտարարություններ, որ 300 հազարը դոլարը դա գումար չի, այդ գումարը պետք է լինի... Ես խնդրում եմ, որ եթե կան այդ գումարով մարդիկ, ես խնդրում եմ, թող այդ գումարով գան, մասնակցեն ընտրությանը և ներդնեն 300 հազար դոլարը բռնցքամարտի մեջ: Խոսքս Գագիկ Ծառուկյանի արած հայտարարության մասին է: Դա կլինի միայն գումարի տեսքով, որպես աջակցություն, թե կլինի թեկնածուի հետ միասին, ես համաձայն եմ բոլոր պայմաններին: Ես հայտարարում եմ՝ բիզնեսմեն չեմ, մարդ եմ, որը տիրապետում է սպորտին: Եվ կարողանում եմ կազմակերպել այնպես, որ դրաից ավել աջակցություն ենք ունեցել: Միայն հայտարարություններ անելով չէ: Կան նման մարդիկ, ես տալիս եմ հնարավորությունը, որ այս մեկ ամսվա ընթացքում առաջադրեն իրենց թեկնածությունը»,- ասաց Գևորգյանը:

Դիտարկմանը՝ Գագիկ Ծառուկյանը մի առիթով նշել էր, որ ՀԲՖ նախկին նախագահ Ռոման Մուրադյանից հետո ֆեդերացիան պարգևավճարներ չի տվել, Գևորգյանը նշեց.

«Պարգևավճարներ տրվել են մի քանի անգամ շատ, դրանք խոսակցությունների մակարդակով են: Եթե պարոն Ծառուկյանն իջեցնում էր 2000 դոլար, ինձ մոտ ստանում էին 7000 դոլար, եթե Աշխարհի չեմպիոնին առաջարկում էր 3000 դոլար, երիտասարդների աղջիկ աշխարհի չեմպիոնը ստանում էր 2-3 անգամ ավելի գումար: Օլիմպիական խաղերի մասնակից դառնալու համար տղաները գումար են ստացել: Ես հենց սկզբից ասել եմ՝ չպետք է լինեն պարգևավճարներ, դա սխալ դաստիարակություն է, ես իրենց դնում եմ ճիշտ ուղղու վրա, որ իրենք իրենց գումարներն աշխատեն և ոչ մեկին պարտք չլինեն: Ֆեդերացիան կթու կով չէ. ո՞վ է ասել, որ ֆեդերացիան պետք է պարգևավճար տա, ֆեդերացիան աշխատանքը կազմակերպողն է: Իսկ եթե ֆեդերացիան տալիս է մարզիկը պետք է շնորհակալ լինի: Մարզիկը պետք է շնորհակալ լինի մարզիչին և իր ստացած գումարից բաժին հանել իր ծնողին, իր մարզիչին»,- ընդգծեց ՀԲՖ նախագահը: