Ֆրեդի Մերկուրիի ընկերը խոսել է արտիստի կյանքի վերջին օրերի մասին․ Mirror

Պիտեր Ֆրեսթոնը՝ «Քուին» խմբի վոկալիստ Ֆրեդի Մերկուրիի ընկերը, Mirror- ին տված հարցազրույցում խոսել է արտիստի կյանքի վերջին օրերի մասին։ Ֆրեսթոնը 1979 թվականից Մերկուրիի անձնական օգնականն ու թիկնապահն էր, ինչպես նաև խնամում էր երգչին կյանքի վերջին ամիսներին: Նրա խոսքով՝ Շվեյցարիայից վերադառնալուց հետո արտիստը դադարել էր օգտագործել հաբերը և սկսել էր պատրաստվել մահվան: «Կարծում եմ, որ նա պարզապես զգացել էր և գիտեր, որ եկել է ժամանակը, - ասել է Ֆրեսթոնը։֊ Իր կյանքի վերջին օրերին արտիստը պարբերաբար ստուգում էր իր՝ տանը պահվող արվեստի գործերի հավաքածուն: Քանի որ Մերկուրին արդեն շատ թույլ էր, նրան տեղափոխեցին աստիճաններով ներքև, որից հետո, հենվելով օգնականի վրա, նրան հաջողվեց հյուրասենյակում և ճապոնական սենյակում մի պտույտ կատարել: Նա սկսեց մեկնաբանություններ տալ, թե երբ և ինչպես է ձեռք բերել հավաքածուի այս կամ այն իրերը», - հիշում է երգչի ընկերը: Ֆրեդի Մերկուրին մահացել է1991 թվականի նոյեմբերի 24-ին՝ Լոնդոնի իր տանը: Մահվան պատճառը բրոնխոպնևմոնիան էր, որը առաջացել էր ՁԻԱՀ-ի ֆոնի վրա: