Բուխարեստում տեղի է ունեցել մեծ ակցիա կորոնավիրուսով պայմանավորված սահմանափակումների դեմ․ Agerpres

Ռումինիայի մայրաքաղաքում՝ Բուխարեստում, մոտ 100 մարդու մասնակցությամբ տեղի է ունեցել բողոքի ակցիա՝ ընդդեմ կորոնավիրուսի համաճարակով պայմանավորված իշխանությունների կողմից ձեռնարկված սահմանափակող միջոցառումների, հայտնում է Agerpres֊ը: Ակցիայի մասնակիցները պահանջում էին կորոնավիրուսի վարակակիրների ու մահացության դեպքերի վերաբերյալ հուսալի տվյալներ հրապարակել: Նրանք պնդում էին, որ սահմանափակումները մտցվել են Սահմանադրության խախտմամբ, քննադատում էին հակասական օրենքները և մամուլի գրաքննությունը։ Հանրահավաքը խախտում էր երեքից ավելի անձանց խմբերով հանդիպումների արգելքը և վիրուսի դեմ պաշտպանության կանոնները։ Մասնակիցները առանց դիմակների և ձեռնոցների էին, չէին հետևում սոցիալական հեռավորությանը: Ոստիկանները, որոնք ներկա էին Վիկտորիայի հրապարակում՝ կառավարության շտաբի դիմաց անցկացվող ակցիային, ցուցապաստառներ էին բաժանում ցուցարարներին՝ անվտանգության նախազգուշական միջոցները նշելով և նախազգուշացնելով, որ հավաքներն արգելված են։ Նրանք կոչ էին անում ցրվել: Ներքին գործերի նախարար Մարսել Վելան ֆեյսբուքում դիմեց նրանց, ովքեր «հավաքվել էին մեծ խմբերով՝ անտեսելով բոլոր պաշտպանական միջոցները»։ Նա կոչ է արել «ռիսկի չենթարկել բոլոր պատասխանատու քաղաքացիների ջանքերը և կարանտինը»: