«Եթե ինչ-որ մեկը ցանկանա ձեռքերը երկարացնել Բելառուսի սահմաններից ներս, մենք ցանկացած պահի կարող ենք կտրել այդ ձեռքերը»․ Պուտինն ու Լուկաշենկոն հանդիպեցին

Վլադիմիր Պուտինի Սոչիի նստավայրում մեկնարկել են բանակցությունները Բելառուսի նախագահ Ալեքսանդր Լուկաշենկոյի և ՌԴ նախագահ Վլադիիմիր Պուտինի միջև: Հանդիպման սկզբում Ռուսաստանի ղեկավարը նշել է, որ հանրապետությունը նախագահական ընտրություններից հետո պետք է զբաղվի իրավիճակով: «Մենք, իհարկե, տեսնում ենք, թե ինչ է կատարվում Բելառուսում, և ականատես ենք այս ընտրությունների հետ կապված ներքաղաքական իրադարձություններին: Դուք լավ գիտեք մեր դիրքորոշումը: Մենք կողմ ենք, որպեսզի առանց դրսից ստացվող հրահանգների և ճնշումների՝ հանդարտ ռեժիմում և միմյանց հետ երկխոսության արդյունքում լուծվի այս խնդիրը, և ընդհանուր որոշում կայացնեք, թե ինչպես կառուցել մեր աշխատանքը», - ասել է Պուտինը:
Նա «տրամաբանական ու ժամանակին» է անվանել նաև Լուկաշենկոյի առաջարկը`հանրապետությունում Սահմանադրության շուրջ աշխատանքներ սկսելու մասին: Պուտինը շեշտել է, որ Մոսկվան հավատարիմ է մնում Բելառուսի, այդ թվում ՝ ՀԱՊԿ-ի և Միության պետության հետ համագործակցության մասին բոլոր համաձայնագրերին:
Ռուսաստանը և Բելառուսը, Պուտինի խոսքով, պետք է վերականգնեն ապրանքաշրջանառությունը, որը նվազել է համաճարակի ընթացքում:
«Ես որոշակի առաջարկներ ունեմ: Ինձ թվում է, որ անհրաժեշտ է կառավարությունների մակարդակով, նախարարությունների, գերատեսչությունների և նույնիսկ առանձին ձեռնարկությունների մակարդակով լրացուցիչ ջանքեր և քայլեր ձեռնարկել առկա խնդիրները վերացնելու և, ինչպես ասացի, պայմաններ ստեղծելու համար», - հավելել է Ռուսաստանի ղեկավարը: Լուկաշենկոն իր հերթին շնորհակալություն է հայտնել Պուտինին Բելառուսի ներքին իրավիճակի վերաբերյալ դիրքորոշման համար:
«Եթե ինչ-որ մեկը ցանկանում է ձեռքերը երկարացնել Բելառուսի սահմաններից ներս, մենք ցանկացած պահի կարող ենք կտրել այդ ձեռքերը: Եվ ես շատ գոհ եմ Ձեզանից, շատ շնորհակալ եմ Ձեզ։ Դուք ցույց տվեցիք, որ Բելառուսի սահմանները Միության պետության սահմաններն են», - ավելացրել է Բելառուսի առաջնորդը։ Նա նաև կոչ է արել իր գործընկերոջը պատրաստել զորքեր՝ դիմակայելու հնարավոր արտաքին ագրեսիային։
Խոսելով կորոնավիրուսի մասին՝ Լուկաշենկոն շնորհակալություն է հայտնել Ռուսաստանին՝ Բելառուսը «պատվաստանյութերի տրամադրման հարցում առաջին տեղում» ներգրավելու համար: