Մսի թանկացումների պատճառը նաև կառավարության ապաշնորհ աշխատանքն է․ Բերբերյան

Տավարի փափուկ միսը այսօր արժե 4000 դրամ։ Սպանդանոցների մորթը ազդեց գնի վրա, եկեք ճիշտն ասենք՝ դա բիզնես է։ Այս մասին ԼՈՒՐԵՐ.com-ի հետ զրույցում ասաց «Ագրարագյուղացիական միավորում» ՀԿ նախագահ Հրաչ Բերբերյանը՝ անդրադառնալով  Հայաստանում մսի թանկացումներին։

Բերբերյանի կարծիքով՝ սպանդանոցային մորթը՝ ելնելով սանիտարահիգենիկ պայմաններից, սպանդանոցների սեփականատերերի պատասխանատվությունը ավելի բարձրացրեց․ «Կառավարությունը, ինչպես միշտ, այն ժամանակ էլ էր ստում, որ, իբրև թե, սպանդանոցային մորթը չի ազդի թանկացումների վրա, սակայն բոլորս էլ տեսնում ենք, որ ազդեց։ Եթե բոլոր կենդանիներին սպանդանոցում մորթեն՝ մսի 1 կիլոգրամի համար 300-500 դրամ կավելանա»։

Նախագահը նշում է՝  նախկինում էլ, հիմա էլ պատասխանատուները անասնաբույժներն են, այնպես որ՝ ոչինիչ չի փոխվել, իսկ սպանադանոցային մորթը ամենևին չի նշանակում, որ շուկայում չի կարող հայտնվել հիվանդ անասունի միս։

Ի տարբերություն նախորդ տարվա՝ այս տարի կարտոֆիլ չի ներկրվի, միայն կարտահանվի։ Բերբերյանի գնահատմամբ՝ սա լավ աշխատանքի արդյունք է․ «Այստեղ կառավարությունը ոչ մի ներդրում չունի, որ հանկարծ փորձեն իրենց վերագրել այդ հաջողությունները։  Հիմա կարտոֆիլագործությունը զարգացած է, ունենք հզոր ֆերմերներ, ժամանակին դա խթանվեց Ռոբերտ Քոչարյանի կողմից, այսինքն՝ ֆերմերներին ինքնուրույնություն տրվեց։ Արդյունքում՝ այսօր կարտոֆիլագործությունը կայուն է։ Ամեն տարի էլ, բացի անցյալ տարվանից, մենք ունենք ավելցուկ, որը պետք է արտահանենք․ գյուղացին որակով սերմացու է ունեցել և բերքը երաշխավորված է եղել»։

«Բանջարեղենը շուկայում շատ մատչելի է, մսի թանկացումն էլ կապված է և՛ սպանդանոցների, և՛ գլխաքանակի անկման հետ․ խոսքը վերջին 3 տարում մոտ 160․000 գլխաքանակի պակասի մասին է։ Այստեղ կառավարության ապաշնորհ աշխատանքն է․ կառավարությունը չի ուզում ֆերմերի հետ աշխատել, փոխարենը՝ սիրում է բանկերի հետ աշխատել։ Գյուղացու հաշվին հարստացնում են բանկերին։  Կարծում եմ՝ այստեղ կա ստվերային տնտեսություն, բյուժեի լուրջ խախտումներ, որոնք վաղ թե ոշ կբացահայտվեն»,- եզրափակեց Բերբերյանը։

Արփինե Հակոբյան