Տիգրայում տղամարդկանց ստիպել են բռնաբարել իրենց ընտանիքի անդամներին. ՄԱԿ

Ավելի քան 500 բռնաբարության դեպքեր են գրանցվել Եթովպիայի Տիգրայ շրջանի հինգ կլինիկաներում, հայտարարել է ՄԱԿ-ը ՝ նախազգուշացնելով, որ իրական թվերը կարող են ավելի շատ լինել:

«Կանայք ասում են, որ իրենց բռնաբարել են զինված տղամարդիկ, նրանք պատմել են նաեւ խմբակային բռնաբարությունների, ընտանիքի անդամների եւ տղամարդկանց աչքի առջեւ բռնաբարությունների մասին»,-ասել է ՄԱԿ-ի Օգնության համակարգողի տեղակալ Վաֆաա Սաիդը, հաղորդում է Reuters-ը:

Նրա խոսքով՝ հինգ առողջապահական հաստատություններ Մեքելլայում, Ադիգրատում, Վուկրոյում, Շիրում եւ Աքսումում հաղորդում են բռնաբարության առնվազն 516 դեպքի մասին:  

ՄԱԿ-ում Եթովպիայի դեսպան Թայե Ատսկեսելասիե Ամդեն ասել է, որ իր կառավարությունը «շատ լուրջ» է ընդունել սեռական ոտնձգությունների մեղադրանքները եւ ուղարկել է փաստահավաք առաքելություն:

«Եթովպիան սեռական հանցագործությունների նկատմամբ վարում է բացարձակ անհանդուրժողականության քաղաքականություն, եւ ցանկացած անձ, ով մեղավոր կճանաչվի, կենթարկվի պատասխանատվության օրենքի ողջ խստությամբ»,-ասել է նա:

Տիգրայում տասնյակ վկաներ ասում են, որ հարեւան Էրիթրեայից ժամանած զինվորները հակամարտության ընթացքում պարբերաբար սպանել են խաղաղ բնակիչների, խմբակային բռնաբարության եւ խոշտանգումների ենթարկել կանանց եւ թալանել տները եւ բերքը:

Էրիթրեան բազմիցս հերքել է, որ իր զորքերը գտնվում են Տիգրայում՝ չնայած Եթովպիայի վարչապետ Աբիյ Ահմեդը խոստովանել է, որ Էրիտրեայի զորքերը գտնվում են տարածաշրջանում: