Եթովպիայում վերջին մեկ շաբաթում առնվազն 100 մարդ է զոհվել․ Al Jazeera

Եթովպիայի Աֆար և Սոմալի շրջանների միջև սահմանային բախումների արդյունքում առնվազն 100 մարդ է զոհվել, հայտնում է տարածաշրջանային պաշտոնյան, գրում է Al Jazeera֊ն՝ վայակոչելով Reuters֊ին։ Մոտ 100 խաղաղ բնակիչ, որոնցից շատերը հովիվներ էին, սպանվել են ուրբաթ օրը՝ բախումների ժամանակ, և այդ բախումները շարունակվել են մինչև երեքշաբթի, հեռախոսազրույցում Reuters գործակալությանը հայտնել է Աֆարի շրջանի ոստիկանության կոմիսարի տեղակալ Ահմեդ Հումդը: Նա բռնությունների համար մեղադրել է Սոմալիի տարածաշրջանային ուժերին, որոնք հարձակվել են խաղաղ բնակչության վրա: Սոմալիի և Աֆարի շրջանների կողմից պահանջվող տարածքում արյունահեղությունն ընդգծում է վարչապետ Աբի Ահմեդի առջև ծառացած անվտանգության խնդիրները, որոնք տարածվում են Տիգրեյում՝ հյուսիսում ծավալվող հակամարտության սահմաններից դուրս: Սոմալիի շրջանի խոսնակ Ալի Բեդելն իր հերթին ասել է, որ ուրբաթ օրը 25 մարդ է սպանվել, իսկ երեքշաբթի օրը նույն ուժերի կողմից հարձակման արդյունքում՝ «անհայտ թվով քաղաքացիական անձինք» են զոհվել: Reuters- ը հայտնում է, որ չի կարողացել ստուգել՝ արդյո՞ք Սոմալիի պաշտոնյայի կողմից հայտնած 25 զոհերը վերը նշված 100֊ի մեջ են, թե՞ ոչ: Միևնույն ժամանակ, Աֆարի շրջանի Ահմեդ Կալոյտեն AFP լրատվական գործակալությանը հայտնել է, որ Սոմալիի հատուկ ոստիկանությունն ու աշխարհազորայինները գրոհել են Հարուկա անունով մի տարածք ի վրա՝ «անխնա կրակելով տեղացիների վրա և սպանելով ավելի քան 30 հովիվների» և վիրավորելով առնվազն 50-ի։ Իշխանությունները, սակայն, հերքում են հարձակումների նախաձեռնումը և խաղաղ բնակչության նկատմամբ բռնությունների մասին մեղադրանքները: