ԵՄ երկրների առաջնորդները կոչ են արել արգելել բելառուսական ավիաընկերություններին թռիչքներ կատարել դեպի Եվրամիություն

Եվրամիության անդամ պետությունների ղեկավարների գագաթնաժողովը որոշում է կայացրել արգելել բելառուսական ավիաընկերություններին թռիչքներ իրականացնել դեպի ԵՄ օդանավակայաններ և թռչել Եվրամիության տարածքով: Այս մասին ասվում է Բելառուսի հարցով ԵՄ գագաթնաժողովի եզրափակիչ հայտարարության մեջ, որն ընդունվել է երկուշաբթի երեկոյան, գրում է ТАСС-ը:

Հաղորդվում է, որ բացի դա, ԵՄ անդամ պետությունների ղեկավարների գագաթնաժողովի որոշմամբ՝ խորհուրդ է տրվում եվրոպական փոխադրողներին հրաժարվել այս երկրի օդային տարածքով թռիչքներից:

Որոշումը դեռ ուժի մեջ չի մտել, այն դեռ պետք է համաձայնեցվի և հաստատվի ԵՄ խորհրդում նախարարների մակարդակով:

ԵՄ գագաթնաժողովը նաև Քաղաքացիական ավիացիայի միջազգային կազմակերպությանը կոչ է արել  հետաքննել Բելառուսում Ryanair-ի չվերթի վայրէջքի հետ կապված միջադեպը:

Ryanair-ի ինքնաթիռը, որը թռիչք էր կատարում Աթենք-Վիլնյուս երթուղով, մայիսի 23-ին արտակարգ վայրէջք է կատարել Միսնկի օդանավակայանում ականապատման մասին հաղորդագրությունների պատճառով: Ինքնաթիռում գտնվել է Nexta տելեգրամյան ալիքի հիմնադիրներից մեկը՝ Ռոման Պրոտասեւիչը, որին Բելառուսի իշխանությունները համարում են ծայրահեղական: Պրոտասեւիչին բերման են ենթարկել: Նրա նկատմամբ հարուցվել է քրեական գործ մի քանի հոդվածների հատկանիշներով, այդ թվում՝ զանգվածային անկարգությունների կազմակերպում: Բերման է ենթարկվել նաեւ նրա ընկերուհին՝ ՌԴ քաղաքացի Սոֆյա Սապեգան: