Մանիպուլյացիա․ թուրք գործակալները տեսանկարահանում են Հյուսիսային պողոտան

«Այլընտրանք» ՀԿ համանախագահ, ակտիվիստ Նարեկ Մանթաշյանն ԱԱԾ ուշադրությունն է հրավիրում Երևանում նկարահանումներ իրականացնող թուրքի արտաքինով մարդկանց վրա։

«Երևանի սրտում՝ Հյուսիսային պողոտայում պատահական հանդիպեցի այս երկու՝ ակնհայտ թուրքական արտաքինով մարդկանց, ովքեր մանրամասն տեսանկարահանում էին ամենը իրենց շրջապատում...

Սա անհանգստացնող փաստ է, որ գործող իշխանությունը արդեն իսկ մեր մայրաքաղաքի անվտանգությունը ապահովել ի զորու չէ...

Հրավիրում եմ ԱԱԾ ուշադրությունը. քաղաքը վխտում է թուրքադրբեջանական գործակալներով, իսկ դուք ձեր հիմնական գործառույթը թողած, ընդիմադիրների հեռախոսներն եք լսում, մեքենաների հետևից սլեժկա անում և շտաբները գաղտնալսում:

Համոզված եմ, որ եթե այդ միջոցներն ուղղեիք մեր իրական թշնամիների դեմ պայքարին, հաստատ այս խղճուկ վիճակը չէինք ունենա այսօր»,- գրել է նա ֆեյսբուքյան իր էջում ու հրապարակել այդ մարդկանց լուսանկարը։

Այս նյութի հրապարակումից հետո factcheck.ge  համակարգի կողմից ստացել ենք վճիռ, որը հրապարակում ենք ստորև.

Մանիպուլյացիա․ թուրք գործակալները տեսանկարահանում են Հյուսիսային պողոտան

Վճիռ՝ մանիպուլյացիա

«Այլընտրանք» ՀԿ-ի նախագահ, Հայաստան դաշինքի համակիր Նարեկ Մանթաշյանը մայիսի 26-ին հրապարակել էր լուսանկար՝ Երևանի Հյուսիսային պողոտայում շրջող երկու տղամարդկանց մասնակցությամբ։ Լուսանկարին կից՝ Մանթաշյանը գրել էր, որ Հյուսիսային պողոտայում պատահական հանդիպել է երկու՝ ակնհայտ թուրքական արտաքինով մարդկանց, ովքեր մանրամասն տեսանկարահանում էին իրենց շրջապատը։ Մանթաշյանը կոչ էր անում ԱԱԾ-ին ուշադիր լինել, քանի որ քաղաքը «վխտում է» թուրքադրբեջանական գործակալներով։ Այս պնդումները փաստազուրկ էին և մանիպուլյատիվ, քանի որ Հյուսիսային պողոտան Երևանի ամենահայտնի վայրերից է, որի բազմաթիվ տեսանկարահանումներ արդեն իսկ ներբեռնված են համացանց և հասանելի բոլորին։ Բացի դրանից՝ Նարեկ Մանթաշյանը որևէ փաստ չէր ներկայացրել, որը կապացուցեր իր մեղադրանքները կամ լուսանկարում երևացող անձանց ազգային պատկանելությունը։

Համատեքստը

Նշենք, որ 44-օրյա պատերազմի ընթացքում շատ էին խոսակցություններն այն մասին, որ Հայաստանում շրջում են օտարերկրյա՝ հիմնականում թուրք և ադրբեջանցի գործակալներ ու նկարահանում տարածքը։ Այդ մասին եղան տարբեր ահազանգեր, Հայաստանում հայտնի երգչուհի Անահիտ Սիմոնյանն իր ինստագրամյան էջում ևս պատերազմի օրերին գրել էր, թե պետք է զգույշ լինել, քանի որ 5 ադրբեջանցիներ արդեն հասել են Երևան։ Այս լուրերից որևէ մեկն այդպես էլ չհաստատվեց, ավելին՝ ԱԱԾ-ն տարբեր անգամներ ստիպված էր հերքելու դրանք։

Պատերազմից ավելի քան կես տարի անց՝ Հայաստանի տարածքում գործակալների փնտրտուքը չի դադարում։ Իշխանությունը՝ ի դեմ վարչապետ Նիկոլ Փաշինյանի, գործակալներ է փնտրում ընդդիմության մեջ, ընդդիմությունն էլ, իր հերթին, մեղադրում իշխանությանը՝ օտարերկրյա գործակալական ցանցերին սպասարկելու համար։

Մանթաշյանի գրառումը փաստազուրկ է

Նարեկ Մանթաշյանի գրառումը պետք է դիտարկել Հայաստանում տիրող իրավիճակի համատեքստում։ Նա փողոցում լուսանկարել է երկու տղամարդու և արտաքինից դատելով ենթադրել, որ վերջիններս թուրք գործակալներ են՝ չբերելով որևէ փաստ, որը կհաստատեր այդ մեղադրանքները։

Նկարում երևացող անձանց նույնականացումը բաց տվյալների միջոցով հնարավոր չեղավ։ Սակայն պետք է նշել, որ Հյուսիսային պողոտան Երևանի ամենակենտրոնական հատվածներից է, այս վայրից կան բազմաթիվ լուսանկարներ, արբանյակային պատկերներ։

Պողոտայի նկարները կարելի է գտնել Google Earth-ում

Դրանք հեշտությամբ կարելի է գտնելGoogle Maps -ում

Ինչպես նաև Yandex Map-ում և այլուր

Ակնհայտ է, որ Նարեկ Մանթաշյանի մտահոգությունը, որ թուրք գործակալները մանրամասն տեսանկարահանում են Հյուսիսային պողոտան, արդարացված չէ, քանի որ չկա որևէ տրամաբանություն Երևանի այս հատվածում լրտեսույթուն իրականացնելու և տարածքները տեսանկարահանելու մեջ, քանի որ բաց աղբյուրներում վաղուց արդեն հրապարակված են Հյուսիսային պողոտայի և հարակից տարածքների արբանյակային 3D պատկերները և փողոցի նկարները։

Այս թեմայով Կնոջը խեղդամահ անելու մեջ մեղադրվող Նարեկ Սարգսյանն ազատ կարձակվի․ Փաստինֆո Կապանի ՔՊ ղեկավարն ազատվել է պաշտոնից. «Հրապարակ» Նարեկ Հախնազարյանը համագործակցության է հրավիրում երաժիշտների Նարեկ Մկրտչյանը մասնակցել է Հնդկաստանի օրվան նվիրված միջոցառման նախարարական ընդունելությանը Կարևոր լուրը փաստորեն սա է, ոչ թե Արցախի հայաթափման տարելիցը. Նարեկ Կիրակոսյան