«Հրապարակ». Սամվել Բաբայանը Տիգրան Ավինյանին խոսք էր տվել

«Հրապարակ» թերթը գրում է. «Ազատական կուսակցության ղեկավար Սամվել Բաբայանն օրերս հայտարարեց․ «ՀՀ օրենսդրության պահանջների խախտման եւ այլ քաղաքական ուժի հետ համագործակցության հուշագրի ստորագրման, նյութերի վերաբերյալ Ազատական կուսակցությունը պաշտոնապես հայտարարում է, որ կուսակցությունը Մեղրի համայնքի ավագանու ընտրությունների արդյունքում որեւէ քաղաքական ուժի հետ համագործակցության հուշագիր չի ստորագրել եւ որեւէ անձի՝ կուսակցության անունից հանդես գալու լիազորությամբ չի օժտել»։

Ակնհայտ է, որ Մեղրիում «Հանրապետության» թեկնածու Բագրատ Զաքարյանի եւ Ազատականի ավագանու համագործակցությունը Բաբայանի հետ համաձայնեցված չէ, իսկ հուշագրով 2 կուսակցության ավագանիները որոշել էին կիսել 5 տարվա պաշտոնավարումը․ 2,5 տարի՝ մեկը, 2,5` մյուսը: Ազատականի ցուցակը գլխավորած Խաչատուր Ասատրյանն ասաց, որ ցուցակը ձեւավորել են Բաբայանի իրավաբանները, իրենք ներկայացրել են պահանջվող բոլոր փաստաթղթերը, պահպանվել է օրենքի պահանջը, ընտրացուցակը ձեւավորվել է 70/30 հարաբերակցությամբ, այսինքն, 70 տոկոսը՝ կուսակցականներ:

Թեեւ Ասատրյանը եւ մանդատ ստացած երկրորդ թեկնածուն անկուսակցական են. «Ավագանու անդամը կարող է դուրս գալ խմբակցությունից` գրավոր տեղյակ պահելով խմբակցության եւ համայնքի ղեկավարին»:

Մեր տեղեկություններով՝ Բաբայանն ամեն ինչ արել է, որպեսզի ՔՊ-ի հետ կոալիցիա կազմեն՝ Ավինյանին խոսք էր տվել, սակայն Ասատրյանն ինքնուրույն որոշում է կայացրել` հուշագիր կնքելով Բագրատ Զաքարյանի հետ»: