Ցեղասպանությունը մի ողջ ժողովրդի բնաջնջման կանխամտածված փորձ էր. Կիպրոսի «Սոցիալ-դեմոկրատական շարժում» կուսակցություն

Կիպրոսի Ներկայացուցիչների պալատի «Սոցիալ-դեմոկրատական շարժում» կուսակցությունը հայտարարություն է տարածել Հայոց ցեղասպանության 107-րդ տարելիցի կապակցությամբ։

Կուսակցությունը նշել է, որ երիտթուրքերի կողմից իրականացված Հայոց ցեղասպանությունն անսահման դաժանության և բարբարոսության դրսևորում է:

«1915 թվականի Ցեղասպանությունը մի ողջ ժողովրդի բնաջնջման կանխամտածված փորձ էր: Այն մեկնարկեց 250 հայ մտավորականների սպանդով, հետո շարունակվեց: Կասկածից վեր է, որ երիտթուրքերը կիրառեցին էթնիկ զտումների մեթոդաբանությունը՝ սպանելով ավելի քան 1,5 միլիոն հայ: Թուրքիան այսօր էլ, Ցեղասպանությունից 107 տարի անց, չի ընդունում, որ Ցեղասպանություն է իրագործել՝ ողջ քաղաքակիրթ աշխարհին ապացուցելով, որ չի մերժում էթնիկ զտումների մեթոդաբանությունը»,- ասվում է հայտարարության մեջ:

«Սոցիալ-դեմոկրատական շարժում» կուսակցությունը հայտարարել է, որ հարգում է երիտթուրքերի կողմից վայրագությունների ենթարկված զոհերի հիշատակը և հայտնում, որ կանգնած է Հայաստանի ժողովրդի, հայ ազգի և հատկապես կիպրահայության կողքին՝ իրենց նահատակների արդարացման համար մղվող պայքարում: