Չպետք է շեղվենք թուրքերի հետ ապրելու մեթոդներ գտնելու օրակարգից. Աղազարյանը՝ Չավուշօղլուի ժեստի մասին

Համացանցում լայն քննարկման արժանացավ օրերս Թուրքիայի ԱԳ նախարար Մևլութ Չավուշօղլուի կողմից «Գորշ գայլերի» ժեստի ցուցադրությանը Ուրուգվայի հայ համայնքին, որը երթ էր կազմակերպել ի հիշատակ Եղեռնի զոհերին:

Հասարակությանը էլ ավելի բարկացրել է այն փաստը, որ Հայաստանը շարունակում է ամեն ինչ անել Թուրքիայի հետ բարեկամական հարաբերություններ հաստատելու նպատակով:

Թեմայի առնչությամբ ԼՈՒՐԵՐ.com -ը զրուցեց իշխանական թևի պատգամավոր Հովիկ Աղազարյանի հետ՝ պարզելու Չավուշօղլուի կողմից «Գորշ գայլերի» ժեստի ցուցադրությունից հետո էլ է մնում իր թիմի կողմից առաջ քաշած գաղափարի՞ն, թե՞ ոչ, նա ասաց, որ կատարվածը չպետք է շեղի իրենց օրակարգից.

«Անկասկած դա չի նպաստում այն օրակարգին, որը մենք հետապնդում ենք, և դատապարտելի է, մանավանդ այն մակարդակով, որ եղավ: Դա չպետք է առիթ լինի, որ մենք շեղվենք մեր օրակարգից: Նմանատիպ դրսևորումներ տարբեր մակարդակներով  կարող են շատ լինել: Թույլ տվեք նկատել, որ դա կարող է, անգամ, միտված լինել նրան, որ մենք շեղվենք մեր օրակարգից, բայց չենք շեղվում չէ՞»,- նշեց իշխանական պատգամավորը՝ հավելելով, որ առաջիկայում պետք է սպասել որոշակի բացատրությունների:

Մեր այն դիտարկմանը, թե ինչ է նշանակում «մեր օրակարգ» արտահայտությունը, Հայաստան-Թուրքիա բարեկամական հարաբերությունների հաստատո՞ւմ նկատի ունի, պատգամավորը փոքրիկ շտկում կատարեց.

«Ո՛չ, բարեկամական չէ, հարևանություն հաստատելու օրակարգ, որ գտնենք իրար հետ ապրելու մեթոդներ: Բարեկամ լինելու համար հլը շա՜տ ճանապարհ կա»,- ասաց Հովիկ Աղազարյանը:

Նա Չավուշօղլուի քայլը համեմատեց հայերի կողմից Թուրքիայի դրոշը այրելուն, սակայն հետո, զգալով, որ դրանք հավասարազոր գործողություններ չեն, ասաց.

«Մեր երկրում էլ այրում են Թուրքիայի դրոշը, դա պահի տակ որոշված քայլ է: Իհարկե, այլ բան է՝ պետական պաշտոնյայի կողմից նման դրսևորումը և լրիվ այլ բան է, երբ հասարակական ինչ-որ քայլ է: Ուզում եմ ասել, որ մենք պետք է թույլ չտանք՝ նման բաներ լինեն»,- նշեց պատգամավորը՝ ընդգծելով, որ Թուրքիայի ԱԳ նախարարի ժեստը չպետք է Հայաստան- Թուրքիա հարաբերությունների ամրապնդման համար «պաուզայի» պատճառ դառնա:

Զվարթ Պետրոսյան