Պատրաստ եմ ցանկացածի շուրջ համախմբվել, այդ թվում՝ Արման Թաթոյանի. Արթուր Վանեցյան

Թե ով է լինելու ապակենտրոն, ցանցային պայքարի միասնական առաջնորդը կամ ով ապագայում որ պաշտոնը կզբաղեցնի, այս պահին չենք քննարկել, լրագրողների հետ հանդիպմանն ասաց ԱԺ «Պատիվ ունեմ» խմբակցության ղեկավար, «Հայրենիք» կուսակցության նախագահ Արթուր Վանեցյանը։

Նա նշեց, թե իրականում պայքարում են ոչ թե զուտ իշխանափոխության համար, այլ պայքարում են հանուն մեկ գաղափարի, ունենալ հզոր երկիր, Հայաստան, Արցախ, և հայկական երկրներում ապրող արժանապատիվ հայ մարդ։ 

«Այդ առաջնորդը կլինեմ ես, դուք, Իշխան Սաղաթելյանը կամ մյուսը, այս պահին, հավատացեք, չի քննարկվել։ Վաղը, մյուս օրը, եթե կհասնենք այն փուլին, որ պետք է խոսենք, թե ով ինչ պաշտոն պետք է զբաղեցնի ապագա կառավարությունում, հավատացեք, մենք կադրային այդ բազան ունենք։ Մենք այնպիսի կադրային բազա ունենք, որ չունի անգամ իշխանությունը, բայց պետության հիմքերն այնպես են խարխլված, որ Հայաստանի վերականգնման գործում պետք է ներառենք բոլոր ուժերին, որոնք ի զորու են աշխատել Հայաստանի և Արցախի համար՝ անկախ նրանից, թե այս պահին որտեղ են և ինչ են անում։ Սփյուռքի ներուժը պետք է անպայման օգտագործենք», - ասաց Արթուր Վանեցյանը։

Հարցին, թե այսօր Ֆրանսիայի հրապարակում հրավիրված քննարկմանը տեսակետ է հնչել, որ մարդու իրավունքների նախկին պաշտպան Արման Թաթոյանը կարող է լինել որպես անցումային վարչապետ և ընդդիմադության առաջնորդ, Արթուր Վանեցյանը պատասխանեց.

«Արման Թաթոյանին համարում եմ գրագետ, բանիմաց, հայրենասեր մարդ, ճանաչում եմ շատ վաղուց, իր հետ ունեմ ընկերական հարաբերություններ։ Չեմ կարող այս պահին պատասխանել հարցին, թե պատրաստ եմ իր շուրջ համախմբվել, թե ոչ։ Ես պատրաստ եմ ցանկացածի շուրջ համախմբվել, ով ի վիճակի կլինի լուծել այն հարցը, որը դրված է բոլորիս առջև։ Ցանկացածի հետ, այդ թվում՝ Արման Թաթոյանի»։