«Լսեցի` կարմիր շորովին տարեք, 3 անգամ փորձեցին բերման ենթարկել, ավտոբուսի մոտից փոշմանեցին». Վարդևանյան

«Հերթական խայտառակ ապօրինությունը տեղի ունեցավ, մասսայական բերման են ենթարկում անմարդկային ձեւով. Մի աղջիկ, որի ձեռքը ջարդված էր, պետք է տեսնեիք, թե ոնց են բերման ենթարկում». Այս մասին այսօր՝ մայիսի 5-ին, Հաղթանակի կամրջի մոտ բողոքի ակցիայի ժամանակ լրագրողների հետ զրույցում ասաց ԱԺ «Հայաստան» խմբակցության պատգմավոր Արամ Վարդևանյանը:

«Իմ վերաբերյալ լսեցի, որ ասում են՝ կարմիր շորովին տարեք, բայց հետո փոշմանեցին, չտարան: Իհարկե, ինձ ճանաչում են եւ երեք անգամ փորձեցին բերման ենթարկել: Բայց միշտ ավտոբուսի մոտ փոշմանում են: Ես դեմ եմ այդ վարքագծին, կողմ եմ, որ բերման ենթարկեն, որ հետո ավելի հետաքրքիր քրեական օրենսգրքով հոդվածներ լինեն այդ ոստիկանների վրա: Վաղ թե ուշ լինելու է»,-նշեց պատգամավորը:

«Ես կոնկրետ մեկի՝ Ալեքսանդր Խաչատրյանի մասով ոստիկաններին զգուշացնում էի, որ անչափահաս է, ձեռքը ոլորելով տարան, ասացին՝ տեղում կճշտենք: Կարծես 15-20 հոգու բերման ենթարկեցին: Իրենց նպատակն էր, որ քայլերթը ընդհատվի, բայց չընդհատվեց»,- հավելեց Վարդևանայնը պատգամավորը:

Հիշեցնենք, որ այսօր ավելի վաղ Հաղթանակի կամրջի մոտ մի խումբ բերետավորներ քաշքշելով փորձեցին բերման ենթարկել նաև «Հայաստան» խմբակցության պատգամավոր Արամ Վարդևանյանին, սակայն քիչ հետո մեկ այլ ոստիկան նրան գրկած հեռացրեց մի կողմ՝ թույլ չտալով նրան բերման ենթարկել: