Ընդդիմությունն այսօրվանից ֆիքսելու է ցուցարարների նկատմամբ բռնություն գործադրող ոստիկանների դեմքերը. Իշխան Սաղաթելյան

Ֆրանսիայի հրապարակում շարունակվող հանրահավաքի մասնակիցները մեկ րոպե լռությամբ հարգեցին պայքարին միացած քաղաքացու հիշատակը, որն այսօր մահացել էր սրտի կաթվածից։

«Քաղաքացին մահացել է, որովհետև տարածքում նաև շտապ օգնության մեքենա չկար։ Այս տարածքում բազմաթիվ անվտանգության աշխատակիցներ, ոստիկաններ կան, բայց օրվա իշխանությունները տարրական շտապ օգնության մեքենա չեն տրամադրում»,- հանրահավաքի ժամանակ ասաց ընդդիմության ներկայացուցիչներից Իշխան Սաղաթելյանը։

Նա պահանջ հնչեցրեց՝ Ֆրանսիայի հրապարակում մշտապես պետք է լինի շտապ բուժօգնության մեքենա, որպեսզի հնարավոր լինի ապահովել քաղաքացիների առողջության հետ կապված խնդիրները։

Իշխան Սաղաթելյանն ամփոփեց նաև օրվա ընթացքում իրականացված բողոքի գործողությունները․ դրանք անցկացվել են ոչ միայն մայրաքաղաքում, այլև մի շարք մարզերում, իսկ այս պահին Երևան-Իջևան միջպետական ճանապարհը փակ է։

«Իրոք, ժողովուրդը ոտքի է կանգնել, համախմբվել։ Մեր պահանջը հստակ է, հանրային պահանջը՝ ձևավորված»,- ասաց նա։

Ընդդիմությունն այսօրվանից ֆիքսելու է ցուցարարների նկատմամբ բռնություն գործադրող ոստիկանների դեմքերը, հայտարարեց նա:

Իշխան Սաղաթելյանի կոչով՝ կրկին բողոքի երթ մեկներկեց դեպի մայրաքաղաքի կենտրոնական փողոցներ, որից հետո Ֆրանսիայի հրապարակում հանրահավաքը շարունակվելու է։

Հնչելու են հայտարարություններ՝ առաջիկա գործողությունների մասին։