Թուրքիան թույլ չի տա ոտնահարել իր իրավունքները և շահերը տարածաշրջանում. Հուլուսի Աքար

«Անկարան թույլ չի տա տարածաշրջանում ստատուս քվոյի ձևավորում, որը ոտնահարում է Թուրքիայի շահերը»: Այս մասին հայտարարել է Թուրքիայի ազգային պաշտպանության նախարար Հուլուսի Աքարը, փոխանցում է Anadolu-ն։

Աքարը դատապարտել է համաշխարհային հանրության դիրքորոշումը, որն «անտեսում է Հունաստանի անվտանգության ուժերի անօրինական գործողությունները, որոնք ուժ են կիրառում միգրանտների և փախստականների նկատմամբ»։

Թուրք նախարարը նշել է, որ «ի տարբերություն հունական կողմի՝ թուրքական ռազմածովային ուժերը փրկում են միգրանտների ու փախստականների կյանքը՝ չթողնելով նրանց մահանալ ծովի մեջտեղում»։

«Այս և այլ փաստեր վկայում են աշխարհի տարբեր տարածաշրջաններում խաղաղության և կայունության գործում թուրքական բանակի ներդրման մասին։ Մեր ռազմական նավաստիները թուրք ժողովրդի հպարտությունն են, թուրքական ծովային սահմանների անվտանգության աշխատակիցները, հումանիզմի սկզբունքների կրողները»,- ասել է Աքարը։

Նրա խոսքով, Թուրքիայի դիրքորոշումը հիմնված է միջազգային իրավունքի նորմերի և երկխոսության միջոցով խնդիրները քննարկելու պատրաստակամության վրա։

«Չնայած Թուրքիայի խաղաղ նկրտումներին, Աթենքը շարունակում է սադրանքները և չի հրաժարվում ագրեսիվ հռետորաբանությունից։ Մենք թույլ չենք տա տարածաշրջանում Թուրքիայի իրավունքների և շահերի ոտնահարում: Մենք դրա համար ունենք և՛ վճռականություն, և՛ ներուժ»,- ընդգծել է Աքարը: