Պաշտոնյաների՝ միլիոնների հասնող գնումները պատերազմի օրերին. ինչո՞վ էին զբաղված ՔՊ-ականները

Սեպտեմբերի 13-ին Ադրբեջանի կողմից Հայաստանի դեմ սանձազերծած լայնածավալ ռազմական ագրեսիայի օրերին ՀՀ մի շարք գերատեսչությունների գնումները, մեղմ ասած, տարակուսանք են առաջացնում: Մի իրավիճակում, երբ ողջ հայությունը զբաղված էր առաջնագծի կարիքների համար գումար հավաքելով, տարատեսակ դրամահավաքներ կազմակերպելով, ՔՊ-ական պաշտոնյաները, կարծես թե, ապրելով այլ՝ զուգահեռ իրականությունում անխնա և ճոխ գնումներին էին տրվել:

Դիցուք՝ սեպտեմբերի 14–ին Երևանի քաղաքապետարանը 24 միլիոն դրամով, որը համարժեք է մոտ 56 հազար ԱՄՆ դոլարին, 60 հազար հատ ցախավել է ձեռք բերել։ Գնումը կատարվել է էլեկտրոնային աճուրդի ընթացակարգով՝ «Լիանա Մարգարյան Ռուբենի» Ա/Ձ–ից։ Ցախավելներ ձեռք բերելու անհրաժեշտություն է տեսել «Երևանի աղբահանության և սանիտարական մաքրում» համայնքային հիմնարկը։

Կոռուպցիայի կանխարգելման հանձնաժողովը սեպտեմբերի 13-ին 373,400 և 408,000 հազար դրամով գրենական պիտույք է գնել մեկ անձից:

ՀՀ առողջապահության նախարարությունը` ի դեմս Անահիտ Ավանեսյանի, անհասկանալի ծառայություններ է գնել մեկ անձից սեպտեմբերի 14-ին` վճարելով պետական բյուջեից 990,000 դրամ:

ՀՀ վիճակագրական կոմիտեն` ի դեմս Ստեփան Մնացականյանի, սեպտեմբերի 14-ին 91,000 դրամ է ծախսել` կենցաղային ապրանքներ գնելու համար:

Սյունիքի մարզպետարանը 486,000 դրամով ավտոմեքենաների վերանորոգման ծառայություն է գնել, մի դեպքում, երբ թշնամին ռմբակոծում էր Սյունիքի մարզի գրեթե բոլոր բնակավայրերը և ողջ ֆինանսական ռեսուրսները պետք է ուղղվեին այդ բնակավայրերի պաշտպանությանը, բնակիչներին օգնություն ցուցաբերելուն:

Աշտարակի համայնքապետարանը` ի դեմս Թովմաս Շահվերդյանի, սեպտեմբերի 14-ին 3075000 դրամով ձեռք է բերել դիզելային վառելիք:

ՀՀ էկոնոմիկայի նախարարությունը 8467200 դրամի Գովազդատեխնիկական նյութերի մշակման և տպագրության ծրագրերի իրականացման ծառայություն է գնել Տպարան ՍՊԸ-ից:

Այս վարքագիծը բնավ էլ նորություն չէ, 2020 թվականի 44-օրյա պատերազմի ընթացքում Ֆինանսների նախարարի պաշտոնը զբաղեցնող Ատոմ Ջանջուղազյանը, ում պահ էր տրված պետության ամբողջ գանձարանը, պատերազմի ամենաթեժ օրերին ևս զերծ չի մնացել ինքն իրեն պարգևատրելուց մոտ 73 մլն դրամով:

Ինչպես տեսնում ենք՝ պատերազմի թեժ օրերին, երբ համայն հայությունը մեկտեղել էր ջանքերը բանակի կողքը կանգնելու և հայ զինվորին նյութական օժանդակություն ցուցաբերելու նպատակով, ՔՊ-ական, հեղափոխական պաշտոնյաները առաջնորդվում էին լիովին այլ նպատակներով և առաջնահերթություններով...