Հայաստանին փոխանցված 32 զոհված զինծառայողների թվում էր նաեւ Շավարշ Մարգարյանը․ նա փետրվարին պետք է զորացրվեր

Սեպտեմբերի 17-ին ադրբեջանական կողմից Հայաստանին փոխանցված 32 զինծառայողների աճյուներից մեկը եղել է 20-ամյա Շավարշ Մարգարյանինը։

20-ամյա Շավարշը Արարատի մարզի Լանջառ գյուղից էր։ Ծառայում էր Կապանում։ 2023 թվականի փետրվարին պետք է զորացրվեր։

«Շավարշը վարորդ էր, ավտոմեքենայով հաց էր հասցնում տղաներին։ Այդ օրն էլ է տարել, երբ ցանկացել է վերադառնալ, իրեն ասել են, որ շտապօգնության մեքենան շրջվել է, խնդրել են օգնել։ Հետո արդեն վերադառնալիս ավտոմեքենան պայթել է ականի վրա։ Մենք ադրբեջանական տեսանյութերից մեկում տեսել ենք իրեն, բայց չեն կարող ասել, թե ինչ վիճակում էր»,- NEWS.am-ի հետ զրույցում ասաց Շավարշի համագյուղացին։

Հիշեցնենք, որ սեպտեմբերի 13-ին՝ ժամը 00:05-ից, Ադրբեջանի ԶՈՒ ստորաբաժանումները սահմանի ողջ երկայնքով հրետանային միջոցներից, խոշոր տրամաչափի հրաձգային զինատեսակներից սկսել էին ինտենսիվ կրակ վարել հայկական դիրքերի ուղղությամբ՝ կիրառելով նաեւ ԱԹՍ-ներ: Հակառակորդը հարվածում էր թե՛ ռազմական, թե՛ քաղաքացիական օբյեկտներին։ Պաշտպանության նախարարության հաղորդմամբ՝ սեպտեմբերի 14–ին, ժամը 20։00–ից բոլոր ուղղություններով կրակը գրեթե դադարել է, էական միջադեպեր չեն արձանագրվել։ Սեպտեմբերի 21-ի դրությամբ՝ հայ-ադրբեջանական սահմանին իրադրության փոփոխություն չի արձանագրվել:

Վերջին տվյալով՝ զոհվածների եւ անհետ կորածների թիվը հասնում է 207-ի, գերեվարվել է 20 զինծառայող։