Էրդողանը բարձր մակարդակով հանդիպումներ կանցկացնի. Reuters

Թուրքիայի նախագահ Ռեջեփ Թայիփ Էրդողանը ծրագրում է սեպտեմբերի 23-ին բարձր մակարդակով հանդիպում կազմակերպել՝ քննարկելու «Միր» վճարային համակարգը և Արևմուտքի հնարավոր պատժամիջոցները։ Այս մասին գրում է Reuters-ը։

Հանդիպմանը Էրդողանը կքննարկի նաև «Ռուսաստանի հետ համաձայնությունը», հնարավոր պատժամիջոցների սահմանումը և ընդհանուր տնտեսական իրավիճակը, հայտնում են աղբյուրները։

Ավելի վաղ Թուրքիայում ՌԴ դեսպանատունը ռուս զբոսաշրջիկներին խորհուրդ էր տվել երկրում գտնվելու ընթացքում կանխիկ գումար օգտագործել՝ թուրքական խոշոր բանկերում ռուսական «Միր» վճարային համակարգի քարտերի աշխատանքի հետ կապված խնդիրների պատճառով։

Մինչ այդ հայտնի էր դարձել, որ թուրքական երկու խոշոր բանկերը դադարեցրել են «Միր» քարտերի ընդունումը։ Հաղորդվում է, որ այս որոշումը հաջորդել է ԱՄՆ գանձապետարանի հայտարարություններին ռուսական վճարային համակարգի օգտագործման հնարավոր պատժամիջոցների մասին։

Reuters-ը, վկայակոչելով ԱՄՆ վարչակազմի բարձրաստիճան պաշտոնյային, հաղորդում է, որ ԱՄՆ-ն հույս ունի, որ աշխարհում աճող թվով բանկերը կհրաժարվեն աշխատել ռուսական «Միր» վճարային համակարգի հետ: