Թուրքիան ցանկանում է ավելի շատ գազ գնել ԱՄՆ-ից

Անկարան ցանկանում է ավելացնել ԱՄՆ-ից գնվող գազի քանակը։ Այս մասին հայտարարել է Թուրքիայի նախագահ Ռեջեփ Թայիփ Էրդողանը Նյու Յորքում Թուրք-ամերիկյան գործարար խորհրդի նիստում, փոխանցում է РИА Новости-ն։

«Մենք ցանկանում ենք առաջիկա ժամանակահատվածում ավելացնել ԱՄՆ-ից ավելի շահավետ պայմաններով գնվող գազի ծավալը»,- ասել է Էրդողանը։ Նրա խոսքով՝ Թուրքիան պատրաստ է համագործակցել ամերիկյան հեղուկ բնական գազի երկիր մատակարարելու հարցում։

Նշվում է, որ ներկայումս Թուրքիա գազի հիմնական մատակարարումները կատարվում են Ռուսաստանից, Ադրբեջանից և Իրանից։

Ավելի վաղ Ռեջեփ Թայիփ Էրդողանը հայտնել էր, որ իր ռուս գործընկեր Վլադիմիր Պուտինի հետ խոսել է գազի գնի շուրջ և հույս ունի, որ վառելիքը գնելիս զեղչ կլինի։ Նա հավելել է, որ իր երկիրը ռուսական գազի մատակարարման հետ կապված խնդիրներ չունի, քանի որ Անկարան Մոսկվայի դեմ պատժամիջոցներ չի կիրառել։