Կինն իմացել է իր հղիության մասին ու մեկ օր անց ծննդաբերել
ԱյլՄեծ Բրիտանիայի Թրոուել գյուղից 25-ամյա Մոլի Գիլբերտը հղիության 39-րդ շաբաթում է պարզել, որ հղի է և մեկ օր անց ծննդաբերել է: Հաղորդում է Nottingham Post-ը:
Կինը իմացել է, որ մայր է դառնալու, երբ գնացել է հիվանդանոց` բուժզննում անցնելու։ «Մարտի վերջից պարբերաբար գնում եմ բժշկի, քանի որ քաշս մեկ ավելանում էր, մեկ նվազում: Դա տեղի է ունեցել տարիների ընթացքում, բայց հատկապես վերջին մի քանի ամիսների ընթացքում քաշս փոխվել էր»,- ասում է Գիլբերտը։ Բժիշկները երկար ժամանակ չէին կարողանում հասկանալ կնոջ վատառողջության պատճառը և միայն արյան ստուգումից հետո պարզել են, որ հղի է։
Գիլբերտը ենթադրում էր, որ վեց ամսական հղի է, քանի որ վեց ամիս առաջ էր բաժանվել ընկերոջից։ «Ես ոչ մի ախտանիշ չունեի, ոչ մի տհաճություն կամ որևէ այլ բան, պարզապես քաշի ավելացում կար, բայց ստամոքսս մեծ չէր», - հիշում է կինը: Նա որոշել է հաջորդ օրը դիմել մանկաբարձուհու և գնացել է տուն՝ ծնողների հետ կիսվելու ցնցող լուրով:
Մեկ օր անց, երբ կինը աշխատանքի վայրում հանդիպում էր մորը, նրա ջրերը հանկարծակի գնացել են։ Հիվանդանոցում նա պարզել է, որ 39 շաբաթական 6 օրական հղի է և շատ շուտով կծննդաբերի։ «Կարծում եմ, որ բախտս բերել է, քանի որ խուճապի մատնվելու կամ ծննդաբերության մասին սարսափելի պատմություններ լսելու ժամանակ չունեի», - ասում է նա: