Ֆինլանդիան և Շվեդիան այս տարի կդառնան ՆԱՏՕ-ի պաշտոնական անդամ. ԱՄՆ դեսպան

Ֆինլանդիան և Շվեդիան ՆԱՏՕ-ի պաշտոնական անդամ կդառնան մինչև այս տարվա վերջ, գրում է Politico-ն՝ վկայակոչելով Ֆինլանդիայում ԱՄՆ դեսպան Դուգլաս Հիկիին։

Հիկին, ով ապրիլին երդվել է՝ որպես դեսպան, լավատեսություն է հայտնել, որ ՆԱՏՕ-ն մինչև տարեվերջ կունենա 32 անդամ։

Թերթի տվյալներով՝ ՆԱՏՕ-ի 30 անդամներից միայն երեքն են մնացել Հյուսիսատլանտյան դաշինքին Շվեդիայի և Ֆինլանդիայի անդամակցության վավերացման համար։

Հրատարակության համաձայն՝ Սլովակիան կանաչ լույս կտա ՆԱՏՕ-ին միացող երկրներին։

Բացի այդ, Ֆինլանդիայում ԱՄՆ դեսպանը հունգարացի գործընկերոջ հետ հանդիպումից հետո կարծում է, որ շուտով դրական քվեարկություն տեղի կունենա նաև Հունգարիայում։

Ըստ Հիկիի՝ Թուրքիայի նախագահ Ռեջեփ Թայիփ Էրդողանը չի ցանկանում միակը լինել, ով համաձայն չէ, ուստի արագ կլուծի Ֆինլանդիայի և Շվեդիայի՝ ՆԱՏՕ-ին միանալու հարցը։

«Ես չեմ կարծում, որ նա ցանկանում է շատ երկար մենակ մնալ», -ասել է Հիկին:

«Ֆինլանդիան ժամանակակից պատմության մեջ ամենապատրաստն է բոլոր երկրներից՝ ՆԱՏՕ-ին անդամակցելու: Նրանք հասկանում են, որ պատրաստվում են պաշտպանել ոչ միայն մեկ ուրիշին, այլ նաև իրենց»,- հավելել է դեսպանը:

Որպեսզի Ֆինլանդիան և Շվեդիան միանան ՆԱՏՕ-ին, անհրաժեշտ է միանալու արձանագրությունների վավերացումը դաշինքի բոլոր 30 անդամների կողմից։ Միայն Թուրքիան է որոշակի դիմադրություն ցույց տալիս հյուսիսային երկրների ծրագրերին։

Հունիսի 28-ին ՆԱՏՕ-ի գագաթնաժողովում ստորագրված փոխըմբռնման հուշագրում Թուրքիան դեռևս աջակցում էր սկանդինավյան երկրների՝ ՆԱՏՕ-ին միանալու հայտին այն բանից հետո, երբ այն ամրագրեց Ֆինլանդիայի և Շվեդիայի՝ ահաբեկչության դեմ համատեղ պայքարելու խոստումը։