Կընդունի՞ աշխարհը ՌԴ-ին միանալու հարցով հանրաքվեների արդյունքները․ քաղաքագետը նոր ռեգիոնալ պատերազմներ է կանխատեսում

Սեպտեմբերի 23-ին ԴԺՀ-ում, ԼԺՀ-ում, Խերսոնի և Զապորոժիեի շրջաններում մեկնարկել են ՌԴ-ին միանալու հարցով հանրաքվեները, որոնք կշարունակվեն մինչև սեպտեմբերի 27-ը։ Արևմուտքն ու Եվրոպան արդեն լուրջ մեղադրանքներ են ուղղել Կրեմլի հասցեին, Շվեյցարիան էլ հայտարարել է, թե չի ընդունելու այդ «խայտառակ» ռեֆերենդումների արդյունքները։ 

Հանրաքվեների անցկացումը որքանո՞վ կազդի ռուս-ուկրաինական հակամարտության վրա, և արդյո՞ք խաղաղ բանակցությունների հեռանկարն այսպիսով առավել մշուշոտ չի դառնում։

«Կարծում եմ, որ ճիշտ հակառակն է, ապագա բանակցությունները որոշակիություն են ստանում։ Դոնբասի բնակչությունն այլեւ չի կարող Ուկրաինայի կազմում մնալ, հայտնի պատճառով, իսկ հրաժարվել տարածքներից Ուկրաինայի ոչ մի կառավարություն չի կարող։ Հանրաքվեներով կարմիր գծերն են որոշակիանում»,-նման կարծիք հայտնեց քաղաքագետ Ստեփան Դանիելյանը։ 

ԼՈՒՐԵՐ․com-ի զրուցակցի պնդմամբ, բոլոր դեպքերում, Մոսկվայի և Կիևի հետագա բանակցությունների թեման կոնկրետանում է։

Մեր այն դիտարկմանը, թե արդյո՞ք աշխարհը կընդունի հերթական անէքսիայի արդյունքները, քաղաքագետն ասաց․

«Ո՞ր աշխարհը։ Աշխարհը հիմա տարանջատված է, չկա այլեւս միջազգային կարգ, ու այդ տարանջատումը գնալով խորանում է։ Հիմա ամեն երկիր իր մասին է մտածում, մենք մուտք ենք գործում տարերային աշխարհի ժամանակաշրջան, ու սպասվում են նոր ռեգիոնալ պատերազմներ, տնտեսական ու պարենային ճգնաժամներ։ Եվս մեկ տարի ու «աշխարհը» կարող է ամեն ինչի հետ համաձայնվել, միայն թե այս վիճակից կարողանան դուրս գալ»,-ընդգծեց Ստեփան Դանիելյանը։

Արա Ալոյան