Փաշինյանի՝ կոռուպցիայի դեմ պայքարող թիմակիցները պարապուրդի են մատնված

Կառավարության ղեկավար Նիկոլ Փաշինյանը վերջին շրջանում հաճախ է անդրադառնում կոռուպցիայի դեմ պայքարին, որը, ըստ վերջինիս, տարեցտարի էլ ավելի արդյունավետ է դառնում: Սակայն, հայացք նետելով Փաշինյանի ենթականերին, ովքեր կոչված են ի պաշտոնե պայքարել այդ նույն կոռուպցիայի դեմ, հասկանալի է դառնում, որ պայքար կոչվածը ընդամենը իմիտիացի է:

Դիցուք՝ նորաստեղծ Հակակոռուպցիոն կոմիտեն, որը ղեկավարում է Սասուն Խաչատրյանը, իր հետ վերցրել է այլևս գոյություն չունեցող Հատուկ քննչական ծառայության գույքը, սակայն շարունակում է բյուջեի հաշվին փոխել սենյակների կահույքը, և թանկարժեք գնումներ անել։ Կոռուպցիայի դեմ պայքերելու նպատակով ստեղծված կոմիտեն վերջին տասը ամսում 189 մլն 300 հզր դրամ (մոտ 455 հզր դոլար) է հատկացրել ավտոպարկի թարմացման համար։ Փոխարենը պարզվում է Խաչատրյանի հիմնարկն այն աստիճանի է պարապուրդի մատնված, որ կոմիտեի ֆեյսբուքյան պաշտոնական էջում միայն թափուր աշխատատեղերի մասին հայտարարություններ են, հարկային տեսուչներին կաշառք ստանալու վրա բռնելու մասին տեղեկություն, և երեք տարի առաջ բնապահպանության նախկին նախարարի Բուլկի Արամի՝ Արամ Հարությունյանի դեմ հարուցված քրեական գործի մասին Հ1-ի ռեպորտաժը: Իսկ թե ինչու Հարությունյանի գործը դեռ դատարան չի հասել՝ դժվար է ասել: Նշենք, որ որպես ՀՔԾ պետ` Խաչատրյանը  արդյունավետ աշխատանքով աչքի չընկավ, բոլոր քիչ թե շատ աղմկոտ քրեական գործերը մեկը մյուսի հետևից քանդվեցին: 

Նիկոլ Փաշինյանի որոշմամբ ՊՎԾ պետի պաշտոնն ամիսներ առաջ ստանձնեց շրջակա միջավայրի նախկին նախարար, Կոտայքի նախկին մարզպետ Ռոմանոս Պետրոսյանը: Ըստ Նիկոլ Փաշինյանի` վերջինս պետք է դառնա իր աչքերը պետական կառույցներում և վեր հանի խախտումներն ու չարաշահումները, այսպես ասած՝ կոտրի կոռուպցիայի ողնաշարը պետական համակարգում: Անցել է բավականին երկար ժամանակ, սակայն Փաշինյանի «աչքերը» ակնհայտորեն իրենց չեն արդարացնում: Ընդամենը  բացահայտվել են Երևանի քաղաքապետարանի նախկին պաշտոնատար անձանց կողմից համայնքային հողերն օրենսդրության պահանջների խախտումներով օտարելու դեպքեր:  2022 թվականի առաջին եռամսյակում իրականացվել է ընդամենը 106 մշտադիտարկում և, բնականաբար, ոչ մի աղմկոտ բացահայտում դրանց չի հետևել: Բյուջետային հայտերի շուրջ հանրային քննարկումներ են տեղի ունեցել, Ռոմանոս Պետրոսյանը բազմաթիվ հարցազրույցներ է տվել: Փաշինյանի հրահանգով ՊՎԾ-ն ստուգումներ էր սկսել առողջապահության նախարարությունում, սակայն ամիսներ շարունակ որևէ նորություն և առաջխաղացում չի նշմարվում:

Վերահսկիչ պալատի նախագահ ամիսներ առաջ ընտրված Ատոմ Ջանջուղազյանն այս ընթացքում կարողացել է վեր հանել միայն առողջապահության նախարարությունում Արսեն Թորոսյանի նախարար եղած ժամանակ թույլ տրված չարաշահումները, սակայն դրանք, կարծես թե, շատ ու շատ այլ բացահայտումների պես ջրվելու են, քանի որ Փաշինյանը չի ցանկանում թիրախավորել իր մտերիմ թիմակցին:

Ինչպես տեսնում ենք՝ կոռուպցիայի դեմ պայքարը հիմնականում կրում է բուտաֆորիկ բնույթ, քանի որ այդ պայքարի արդյունքը հպարտ քաղաքացիները դեռևս չեն տեսնում, սակայն կարևորն այն է, որ վարչապետը առիթ է գտնում պարբերաբար հպարտանալու կոռուպցիայի դեմ պայքարում իր թիմակիցների «հաղթանակներով»...