Այս թրքահպատակ իշխանությունները տապալեցին այն ամենը, ինչ կերտվել էր մեր հազարավոր քաջորդիների արյան գնով․ արցախցի պատգամավոր

Այսօր հայոց օրացույցի ամենասև էջերից մեկն է․ լրանում է Արցախյան 44-օրյա պատերազմի 2-րդ տարին, պատերազմ, որ մեզնից տարավ ոչ միայն հազարավոր լուսավոր տղերքի, այլև՝ բազում քաջերի դարձրեց վիրավոր, հաշմանդամ, բյուրավոր մարդկանց ստիպեց բռնել պանդխտության ցուպն ու դառնալ տարագիր, հարյուրավորներին դատապարատեց անհետ կորած կամ ռազմագերի լինելու ճակատագրին, այլև, ըստ էության, մեր սուրբ Արցախին բզկտեց՝ թշնամու վերահսկողության տակ թողնելով հայկական շեները։

Ցավի այս բեռով ու խորհրդածությունների այս պաշարով շարունակում ենք ապրել։

«Հիմա խորհրդածելը անասելի դժվար է դարձել, երբեմն անհնար է միայն միտքը սառը պահել, քանզի սիրտը անընդհատ ճնշում է ու վրեժ պահանջում: Երեկվանից անդադար հիշում եմ, վերհիշում ու միայն մի միտք է. ինչքա՜ն երջանիկ էինք, ապահով, բարեկեցիկ...այս թրքահպատակ իշխանությունները տապալեցին այն ամենը, ինչ կերտվել էր մեր հազարավոր քաջորդիների արյան գնով: Միայն ու միայն Նիկոլ Փաշինյանի ու Արայիկ Հարությունյանի  գլխավորությամբ հայատյաց իշխանությունները մեզ հայրենազուրկ դարձրեցին, իրենց շնորհիվ աշխարհը հային վախկոտ, խեղճ ու ստորացված է տեսնում, խեղաթյուրեցին ու շարունակում են խեղաթյուրել մեր պատմությունն ու մինչ իրենց հաջող ընթացք ունեցող բանակցային գործընթացը, իսկ այժմ այն ամբողջությամբ տապալված է և կախված միմիայն գերտերությունների քմահաճույքից»,-ԼՈՒՐԵՐ․com-ի հետ զրույցում ասաց Արցախի հանրապետության ԱԺ պատգամավոր Մետաքսե Հակոբյանը։

«Ամենադաժան բանը, որ արեցին, մեր պանթեոնների եռակի մեծացնելն է, ինչը կանգ չի առնում»,- նկատեց արցախցի խորհրդարանականը։

«Գիտակցումը, որ տղաները այլևս երբեք չեն վերադառնա, մեր սերնդին այլևս ապրելու հնարավորություն չի տա ու այս դեպքում սիրտն ու միտքը վրեժի պահանջն են դրել: Մեր գլխին պատուհաս դարձած իշխանությունները մեզ ճնշելով, պատերազմով վախեցնելով (իսկ պատերազմը հենց իրենց սցենարն է) փորձում են կոտրել ու վերացնել պայքարի ոգին ու ցանկությունը: Բայց այն կա, միգուցե դեռևս ամբողջովին չձևավորված, բայց արդեն կա ու օր օրի ավելի է մեծանում: Հիմա կա Հայի փրկության միայն  մի օրակարգ․ այն է՝ ողջ հայության համախմբումը հանուն Հայաստանի ու Արցախի պաշտպանության գաղափարի շուրջ...»,-ընդգծեց Մետաքսե Հակոբյանը։

Արա Ալոյան