Կատալոնիայի ղեկավարը հայտարարել է անկախության նոր հանրաքվե անցկացնելու մտադրության մասին

Կատալոնիայի կառավարության ղեկավար Պերե Արագոնեսը հայտարարել է, որ մտադիր է Իսպանիայի կառավարությանը համաձայնագիր առաջարկել տարածաշրջանի ինքնորոշման հանրաքվե անցկացնելու վերաբերյալ։ Նրա խոսքերը հայտնում է El Mundo-ն։

«Սա այն գործիքն է, որը մեզ անհրաժեշտ է պետության հետ քաղաքական հակամարտությունը լուծելու համար», - ասել է Արագոնեսը:

Նա ընդգծել է, որ ցանկանում է առաջարկել այսպես կոչված հստակության համաձայնագիր՝ կատալոնական հասարակության առավելագույն աջակցությամբ։

2017 թվականի հոկտեմբերի 1-ին Կատալոնիայում հանրաքվե է տեղի ունեցել Իսպանիայից տարածաշրջանի անջատման հարցով։ Մադրիդը քվեարկությունը հայտարարել է ոչ լեգիտիմ և հրաժարվել ճանաչել դրա արդյունքները։

Ավելի ուշ Կատալոնիայի խորհրդարանը հաստատեց անկախ հանրապետություն հռչակող բանաձեւը: Իսպանիայի իշխանությունները արձագանքեցին՝ կիրառելով սահմանադրության 155-րդ հոդվածը, որը հնարավորություն տվեց սահմանափակել Կատալոնիայի ինքնակառավարումը։