ԵՄ-ն դատապարտում է անօրինական «հանրաքվեների» անցկացումն ու դրանց կեղծ արդյունքները. Բորել

ԵՄ դիվանագիտության ղեկավար Խոսեպ Բորելը Դոնեցկի և Լուգանսկի Ժողովրդական Հանրապետություններում, ինչպես նաև Խերսոնի և Զապորոժիեի մարզերում անցկացված հանրաքվեները «Ուկրաինայի ինքնիշխանության և տարածքային ամբողջականության խախտում» է անվանել։

Ինչպես հայտնի է, սեպտեմբերի 23-27-ը Դոնեցկի և Լուգանսկի Ժողովրդական Հանրապետություններում, ինչպես նաև Խերսոնի և Զապորոժիեի մարզերում Ռուսաստանին միանալու հարցի շուրջ հանրաքվեներ են անցկացվել։ ԴԺՀ-ում քվեաթերթիկների 100%-ի մշակման արդյունքներով՝ Ռուսաստանի Դաշնությանը միանալու օգտին է քվեարկել բնակչության 99,23%-ը, ԼԺՀ-ում՝ 98,42%-ը, Խերսոնի մարզում՝ 87,05%-ը, Զապորոժիեի շրջանում՝ 93,11%-ը։ Արևմտյան մի շարք երկրների, այդ թվում՝ ԵՄ-ի ներկայացուցիչներ հայտարարել են, որ չեն ճանաչում հանրաքվեի արդյունքները։ Միաժամանակ, հանրաքվեն վերահսկվել է միջազգային դիտորդների կողմից, այդ թվում՝ ԵՄ երկրներից, որոնք հաստատել են քաղաքացիների ազատ կամքը, գրում է Ռիա Նովոստին։

«ԵՄ-ն դատապարտում է անօրինական «հանրաքվեների»անցկացումն ու դրանց կեղծ արդյունքները: Սա Ուկրաինայի ինքնիշխանության և տարածքային ամբողջականության ևս մեկ խախտում է մարդու իրավունքների համակարգված խախտումների ֆոնին»,- գրել է Բորելը Twitter-ում։