ՄԱԿ-ի գլխավոր քարտուղարը բարձր է գնահատել Իրանի դերը տարածաշրջանային խաղաղության մեջ

ՄԱԿ-ի կենտրոնակայանում Իրանի արտաքին գործերի նախարար Հոսեյն Ամիրաբդոլլահյանի հետ հանդիպման ժամանակ Անտոնիո Գուտերեշը բարձր է գնահատել Իրանի նշանակալի դերը տարածաշրջանային խաղաղությանն ու անվտանգությանը նպաստելու գործում, գրում է Tasnim գործակալությունը:

Նա նաև բարձրաձայնել է ՄԱԿ-ի աջակցությունը բոլոր կողմերի՝ Գործողությունների համատեղ համապարփակ ծրագրին (ԳՀՀԾ) վերադարձին՝ հույս հայտնելով 2015 թվականի միջուկային գործարքի վերածննդի համար:

Իր հերթին, իրանցի բարձրաստիճան դիվանագետը նշել է, որ մեծ առաջընթաց է ձեռք բերվել Իրանի դեմ պատժամիջոցների վերացման շուրջ բանակցություններում՝ հավելելով. «Մենք կարծում ենք, որ (վերջնական) համաձայնագիրը հասանելի կլինի, եթե ամերիկյան կողմը գործի իրատեսորեն»։

Իրանում տեղի ունեցած վերջին զարգացումների՝ ոստիկանական բաժանմունքում երիտասարդ կնոջ մահից հետո, Ամիրաբդոլլահյանը Իսլամական Հանրապետությունը բնութագրել է՝ որպես ժողովրդավարական կառույց՝ նշելով. «Մենք կարծում ենք, որ մարդիկ իրավունք ունեն խաղաղ ցույցերի, բայց խաղաղ բողոքը տարբերվում է քաոսից և խախտում է երկրի հասարակական կարգը»։ Իրանի ԱԳ նախարարը վերջին օրերին ՄԱԿ-ի Գլխավոր ասամբլեայի շրջանակներում տասնյակ հանդիպումներ է ունեցել օտարերկրյա պաշտոնյաների հետ, գրում է պարբերականը: