Հարավային Կորեան Չեխիայի միջոցով զենք «կնվիրի» Ուկրաինային

Հարավային Կորեան Ուկրաինային կտրամադրի 75 միլիարդ կրոն (մոտ 2,9 միլիարդ դոլար) զենք՝ տարանցիկ ճանապարհով Չեխիայի տարածքով, ասվում է Mladá fronta DNES թերթի կայքում։

Հրատարակության համաձայն՝ խոսքը Chiron զենիթահրթիռային համակարգերի ու զինամթերքի մասին է, որոնք օգտագործվում են ցածր բարձրություններում թռչող ինքնաթիռների հարձակումները հետ մղելու համար։ Մատակարարումը, որը կլինի ամենամեծերից մեկը ուկրաինական հակամարտության ժամանակ, վճարում է ԱՄՆ-ն։ Զենքը հանրապետություն կգնա «չեխական սպառազինության ընկերություններից մեկի» հասցեով, ապա որպես նվեր՝ կուղարկվի Ուկրաինա։

Նշվում է, որ Հարավային Կորեայի զենքերն ուղղակիորեն չեն կարող ուղարկվել Ուկրաինա՝ Սեուլի պաշտոնական դիրքորոշման պատճառով։ Դեռ գարնանը Հարավային Կորեան հայտարարեց, որ, չնայած Ուկրաինայի մեծ հետաքրքրությանը, պատերազմական գոտի զենք չի մատակարարի։

«Ես չեմ ցանկանում մեկնաբանել այն շահարկումները, որոնք հայտնվեցին ԶԼՄ-ներում Ուկրաինա զենք մատակարարելու մասին։ Չեխիայից Ուկրաինային տրամադրվող օգնությունը շարունակվում է։ Անվտանգության նկատառումներից ելնելով, ինչպես ավելի վաղ ասացի, մենք դա չենք հստակեցնի», - մեջբերում է հրատարակությունը Չեխիայի պաշտպանության նախարար Յանա Չեռնոխովայի խոսքերը։