Լևոն Տեր-Պետրոսյանը կոչ է անում համախմբվել մեր պետականությունը կործանող Փաշինյանի կապիտուլյացիոն օրակարգի շուրջ․ Զոհրաբյան

Լևոն Տեր-Պետրոսյանի վերջին՝ առավելապես «հարմարվողական ու պարտվողական» բնույթի հայտարարությունից օրեր անց համանման շեշտադրումներ այսօր կառավարության նիստում արեց ՀՀ վարչապետ Նիկոլ Փաշինյանը։  Նա խոսեց Հայաստանի ինքնիշխան տարածքի մի մասի օկուպացման մասին, ինչպես նաև խոստովանեց կամ բողոքեց, թե մի շարք գործընկերներ հրաժարվում են սպառազինություն վաճառել Հայաստանին։ 

«Այն, ինչ արեց Լևոն Տեր-Պետրոսյանը, զարհուրելի էր․ մարդը կոչ է անում կոնսոլիդացվել, համախմբվել կապիտուլյացիայի շուրջ, կոչ է անում կոնսոլիդացվել պետականության ավարտի, Հայաստանի «հոգեհանգստի» շուրջ»,- ընդգծեց ԱԺ նախկին պատգամավոր, «Անվտանգություն և ժողովրդավարություն» իրավապաշտպան ՀԿ նախագահ Նաիրա Զոհրաբյանը։ 

ԼՈՒՐԵՐ․ com-ի զրուցակցի պնդմամբ, իրականում Տեր-Պետրոսյանը կոչ է անում համախմբվել մեր պետականությունը կործանող Նիկոլ Փաշինյանի շուրջ։

«Ինձ համար նրա պահվածքն անհասկանալի է, ի՞նչ է, ամեն գնով ուզում է ապացուցել, որ այն, ինչ ասել է Արցախյան առաջին պատերազմից հետո՝ իրականանու՞մ է։ Այսինքն՝ Ադրբեջանի օրակարգով՝ Հայաստանի կապիտուլյացիայի շուրջ չհամախմբվելու այլընտրանքը լինելու է պետականության ավա՞րտ»,-նկատեց քաղաքական գործիչը։

Զոհրաբյանը կարևորեց, որ հանրությունն ու քաղաքական շրջանակները, ըստ էության, մերժեցին Փաշինյան-Տեր Պետրոսյան տանդեմի առաջադրած կապիտուլյացիոն օրակարգը։

«Ինչ վերաբերում է այսօրվա կառավարության նիստում Փաշինյանի «լացուկոծին», ես նրան հարց եմ տվել՝ ինչու՞ չի դիմել Իրանին «Շահեդ 136» անօդաչու թռչող սարքեր գնելու խնդրանքով։ Իրանական փորձագետների շրջանակում հավաստիացումներ կան, որ Իրանը պատրաստ է Հայաստանին վաճառել ժամանակակից զենք՝ «Շահեդ 136»-երը։ Այնպես որ, Փաշինյանի բոլոր լալահառաչ գրառումները, թե Ադրբեջանը հարձակվել է մեր երկրի ժողովրդավարության վրա, կարծեք, նպատակ ունի միջազգային հանրության աչքին խաղալ «կեղծ ժողովրդավարություն», ինչը սխալ օրակարգ է»,-հավելեց մեր զրուցակիցը։

Ադրբեջանն ու Թուրքիան ցույց տվեցին, որ զավթված ամենաբարձր լեռան վրայից՝ Իշխանասարից, «թքած ունեն թե՛ Ռուսաստանի և թե՛ Արևմուտքի վրա»։

Արա Ալոյան