«Անդիպլոմ» միլիոնատերերը. ՔՊ-ականները հերքում են Փաշինյանի թեզը

Երեկ կառավարության նիստի ընթացքում վարչապետ Նիկոլ Փաշինյանը անչափ ռեզոնանսային մի միտք էր հայտնել. նա, մասնավորապես, նշել էր՝ «Եթե մարդն ամիսը 75.000 դրամ աշխատավարձով է աշխատում՝ եկեք հասկանանք, թե դա ի՞նչ է նշանակում: Նշանակում է, որ նորմալ կրթություն չի ստացել, ուրիշ բան չի նշանակում: Ընդ որում,  բարձրագույն կրթության մասին չէ միայն խոսքը, այլև՝ մասնագիտական»: Այսինքն, ըստ վարչապետի, եթե մարդ ցածր աշխատավարձ է ստանում, ապա նրա մասնագիտական որակները ցածր են, հետևաբար, եթե նա բարձր աշխատավարձ է ստանում, ուրեմն ունի անչափ բարձր մասնագիտական որակներ:

Սակայն, արի ու տես, որ հենց Նիկոլ Փաշինյանի թիմակիցները իրենց սեփական օրինակով գալիս են ապացուցելու վարչապետի առաջ քաշած այս թեզի իրականությունից հեռու լինելը: 

Դիցուք՝ ամիսներ առաջ համացանցում ակտիվորեն շրջանառվում է ՔՊ-ական պատգամավոր Հռիփսիմե Հունանյանի հարցազրույցը, որում նա նշել էր, որ թեև ԱԺ պատգամավոր է, այնուամենայնիվ, չունի  բարձրագույն կրթություն, սակայն պլանավորում է ստանալ:

Մամուլը գրել էր, որ Սահմանադրական փոփոխությունների տխրահռչակ նախագծի հեղինակ, իշխանական «Իմ քայլը» ֆրակցիայի պատգամավոր Վահագն Հովակիմյանը, փաստորեն, պարզվում է, ոչ միայն իրավաբան չէ, բայց ԱԺ Պետաիրավական հանձնաժողովում լուրջ-լուրջ նախագծեր է ներկայացնում ու հիմա էլ երկիրը փոթորկած նախագծի հարակից զեկուցող է, այլև առհասարակ չունի բարձրագույն կրթություն: Այսպես, ըստ parliament.am կայքում տեղադրված պատգամավորի կենսագրության, նա 1991-1993թթ. սովորել է ԵՊՀ ռադիոֆիզիկայի ֆակուլտետում: 1996-2000թթ.՝ ԵՊՀ փիլիոսոփայության, սոցիոլոգիայի, հոգեբանության և քաղաքագիտության ֆակուլտետում: Ինչպես նկատելի է, Վահագն Հովակիմյանը երկու ֆակուլտետի անուն է նշել: Իր նշած 1-ին ֆակուլտետում նա սովորել մեկ տարի, իսկ այն, ինչ նշել է՝ որպես երկրորդ ֆակուլտետ, առհասարակ այդ անունով ֆակուլտետ չկա: Ճիշտ է` հետո մամուլը գրեց, որ Հովակիմյանին մեկ օրում հաջողվել էր բարձրագույն կրթությունը հաստատող փաստաթուղթ հայթայթել:

Ինչպես գիտենք՝ իշխող խմբակցության պատգամավոր Անուշ Բեղլոյանը վայր է դրել պատգամավորական մանդատը: Նրան փոխարինելու է «Իմ քայլը» խմբակցության ավագանու անդամ Գայանե Եղիազարյանը: Պարզվում է՝ Գայանե Եղիազարյանը չունի բարձրագույն կրթություն: Ավարտել է Երևանի թիվ 175 դպրոցը, դրանից հետո՝ աշխատանքի անցել Երեւանի Հաստոցաշինական գործարանին կից գործող բնական քարերի արտադրամասում, ապա «Նարեկ» լիակատար տնտեսական ընկերությունում, այնուհետեւ` «Նարեկ Տոպազ» ՍՊԸ-ում՝ որպես որակի պատասխանատու:

Մալաթիա Սեբաստիայի նախկին թաղապետ Դավիթ Կարապետյանը, կարծես թե, նույնպես չունի բարձրագույն կրթություն և հետևաբար նաև Հանրային ծառայության մասին օրենքով չունի այդ պաշտոնը զբաղեցնելու իրավունք։ (Հավանաբար այս է պատճառը, որ վերջինիս կենսագրականը բացակայում էր քաղաքապետարանի կայքից)։

Մամուլը գրել էր, որ, կարծես թե, բարձրագույն կրթություն չունի նաև Սյունիքի արդեն նախկին մարզպետ Մելիքսեթ Պողոսյանը։

Տեղ համայնքի ղեկավար Դավիթ Ղուլունցի որոշմամբ՝ Կոռնիձորի վարչական ղեկավար է նշանակվել 57-ամյա Լենտուշ Հակոբջանյանը, որը չունի բարձրագույն կրթություն։

Փաշինյանի քավոր՝ Տավուշի մարզպետ Հայկ Ղալումյանը չորս տարի սովորել է տնտեսագետ-միջազգայնագետ մասնագիտացմամբ, թերևս գործ ունենք թերի բարձրագույն կրթության հետ:

Եվ վերջապես հենց ինքը՝ վարչապետ Փաշինյանը, դուրս էր մնացել ԵՊՀ-ից, այսինքն՝ ասել, որ վարչապետը, ով այսօր ստանում է միլիոնների հասնող աշխատավարձ, ունի փայլուն բարձրագույն կրթություն, միանշանակ սխալ կլինի:

Հետևաբար հարց է առաջանում՝ իսկ ինչպե՞ս է ստացվում, որ Փաշինյանն ու իր թիմակիցները ակնհայտ թերի բարձրագույն կրթությամբ հաջողում են ստանալ 600 հազարից բարձր աշխատավարձ, ինչո՞ւ այդ դեպքում վարչապետի երեկ հնչեցրած թեզը չի տարածվում ՔՊ-ական պաշտոնյաների վրա...